Shillong Risaw 09: ia ka taiew ba kyrpang na ka bynta ban iada kyrpang ki kynthei hapoh jong ka Ri Bhoi District ia kaba la tip kum ka “Beti Bachao Beti Padhao” la plied a u myntri ka tnad sam umjong ka jylla u Dr C Lyngdoh ha Nongpoh mynta ka sngi.
Haba kren ha kane ka jingialang na ka liang jong u myntri ka sorkar jylla u la ong ba ha kane ka jylla Meghalaya kam don kata ka jingiapher hapdeng ki kynthei bad ki shynrang ki ioh ia ka burom kaba mar kum juh. Hynrei na ka liang jong u myntri ka sorkar jylla u la pynsngew ia ki jingsniew kiba don sawdong jong ki khun samla. U la kyntu ia baroh ban ia shnoh kti lang ban ia khun pyrshah ia ki jingsniew.
Haka jingkren jong u District bad Session Judge jong ka Ri Bhoi District u N Khan u la ong ba kane ka skhim ain kan rung sha ki kyndong kynshrot ban pynsngewthuh ia ki briew ba kane ka skhim kan long kaba jop ha kaba ai jingiada ia ki khun kynthei ha ka ne ka District.
Ha ka jingkren jong ka kong I B Warjri Mission Director kala batai halor kane ka skhim ia kaba la plie da u myntri rangbah duh jong ka Ri ha ka 22.01.2015. Ia kane ka skhim la pyntrei kam ha ki 161 tylli ki District ha ka Ri India bad ka Ri Bhoi District kadei kawei na kito ki District ba la shah jied ban pyntrei kam ia kane ka skhim.
La ong ba ha kane ka jylla Meghalaya ka jingdon jong ki kynthei ka kham duna ban ia ki shynrang, Kane ka skhim ka dei tang ban iada na ka jingpynhap ia ki khun kynthei hynrei ka long ruh ban phah ia ki sha ki skul ba kin pule bad ba kin lah ban pule ha ki kyrdan kiba kham sha jrong khnang ba ka kynthei kan lah ban ieng hala ki jong ki kjat.
Kiwei kiba la ia don lang ha kane ka sngi ki long u Deputy Commissioner jong ka Ri Bhoi District u CP Gotmare, kong D. Phawa, ADM, kong D.D. Syngai, EAC, kong Y.R. Mawlong, EAC, ki nongtrei Anganwadi, ki nongtrei ASHAs, ki khynnah skul bad ki nonghikai.
