Shillong, Kyllalyngkot 06: U myntri rangbah ka jylla u Dr Mukul Sangma mynta ka sngi u la buh ia u mawnongrim ban tei ia ka jingkieng iaid kali halor jong ka wah Ildek, ha Adokgre hapoh jong ka North Garo Hills District.
Haba kren ha kane ka jingialang paidbah na ka liang jong u myntri rangbah u la ong haba la don ka jingshong suk ki paidbah kila sdang ban iohi ia ki kam pynroi. U la ong ba kane ka jingkieng kala sah teng mynta la 20 snem bad u ong ba ynda la dep kane ka jingkieng kan long ka jingmyntoi kaba khraw ia ki paidbah katei ka thain.
U myntri rangbah u la ban jur ban a ka bynta ban kyntiew ia ka roi ka par ha katei ka thain don kam ban don ia ki surok kiba biang bad haba ki biang ki surok ka roi ka par kan kiew ha kane ka thain. Na ka liang jong u myntri rangbah ula kyntu iaki paidbah ba kin ialeh ban pynneh pynsah ia ka shong suk shong sian na ka bynta ban kiew ha ka ioh ka kot.
Ha ka jingkren jong u Dr Mukul u la kren ruh shaphang ka rep ka riang kaba dei kawei na kilad kamai jong ki paidbah, u la kren ruh ia ka jingmyntoi kaba ki paidbah kila ioh na ka MHIS ha kaba ia dei bad ka koit ka khiah haba ki don kam ban leit sha sumar ha ki hospital ki paidbah mynta kila sngewthuh ia ka jingmyntoi jong kane ka MHIS.
Ha ka jingkren jong u Cherak W. Momin u ba dei u MLA jong kane ka jaka u la ong ba da ka jingdon kano ka jaka thoh exsamin ha Adogre kala iarap shibun ia ki samla kiba ialeh ia ka exsamin matrik namar mynta kim don kam shuh ban leit sha Kharkutta, ula ong ruh ba bun ki iing skul la shna ha kane ka thain bad kiwei kiwei ki kam pynroi kiba ka sorkar kala leh. Kiwei kiba la ia donlang ki long u Brigady N. Marak MLA Bajendoba u Marthon J. Sangma MLA Mendipathar, u SP D. P. Marak, North Garo Hills, ADC P.K. Boro North Garo Hills, Additional Chief Engineer G. Marak.
