Shillong, Iaiong 13: U Symbut myntri rangbah ka jylla u bah Prestone Tynsong, u la ong ba ka kabinet mynta ka sngi kala shim ia ka rai ban shah ban plie ia ki iew shnong ha kaba ka ia dei ia thied kan long tang ki briew na ka jylla.
La ong ba mynshuwa ka kabinet kala rai ban plie noh ia kiwei kiba juh long shisien shitaiew hynrei mynta ka sngi ka kabinet kala shim ia ka rai ban shah ban plie tang ia ki iew shnong kaba ka ia die ia thied kan dei tang na kato ka thain.
Haba ia dei bad ki iew kiba ia jan bad ka khappud jong ka jylla Assam, kum ka West Jiantia Hills District, East Jiantia Hills District, Ri Bhoi District, West Khasi Hills District, North Garo Hills District bad West Garo Hills District, la aiti sha ki Deputy Commissioner ba kin piet bad shim ia ka rai.
Haba ia dei bad ka rai jong ka sorkar ban iarap ia ki long iing kiba duk kiba khlem ioh ia kano kano ka jingiarap na ka sorkar, ka kabinet mynta ka sngi kala ioh jingkhein ba baroh ki ioh ia ka jingiarap kaba T.700/- shitaiew ki long haduh 1,20,2000/- ngut bad kane ka jingsiew kan long na ka bynta lai taiew kata kin ioh T.2100/- tyngka.
