Shillong, Naitung 25: U Bah Ronie V Lyngdoh MDC jong ka Mylliem Konstitwesi haba kren halor ka kaiphot kaba la wanrah da u Deputy CEM jong ka KHADC u Bah Pyndiaid Sing Syiem halor ka jingthung biang ia u Lyngdoh ka Sohiong bad ia u Syiem jong ka Sohra ha dien ba la weng ia ki shipor da ka EC.
Ha dien ba la sioh ia ka jingkren na u Deputy CEM u bah Pyniaid Sing Syiem ba ki nongujor kim lah ban pynshisha halor ka jingkynnoh ia u Lyngdoh Sohiong u Bah Batskhemlang Lyngdoh bad kum juh ia u Syiem jong ka Hima Sohra u Pa’im Freeman Sing Syiem ka EC kala thung biang ia ki.
Halor kane ka jingpynsngew jong u Deputy CEM, na ka liang jong u MDC ka Mylliem u la kyntu ia ka Executive Committee ba nangne sha khmat dei ban pynshitom ia kito kiba ujor khlem nongrim pyrshah ia ki khlieh nongsynshar namar kane ka wanrah ia ka jingklumar ha ki shnong ki thaw.
Nalor kitei ki ar tylli ki hima, u Deputy CEM u la wanrah ruh ia ka kaiphot halor ka jingweng noh ia u Syiem jong ka Hima Mawsynram u Amossingstar Malangniang, la iathuh ruh ba ka jingpynkhreh ban pynlongnoh ia ka ilekshon jied Sirdar hapoh jong ka elaka Marbisu.
