Shillong, Jylliew 20: Mynta ka sngi sngi kala don ka jingiakynduh ki lai ngut ki MLA bad MDC ia ki nongialam jong ka KSU ba dei jong ka South West Khasi Hills District ban ia kren halor ka jingwan rung ki briew ba na bar hapoh ka District.
Ki lai ngut ki MLA kiba la ia don ha kane ka jingialang ki long u bah Renikton L Tongkhar MLA jong ka Mawkyrwat, u bah Himalaya Shangpliang MLA jong ka Mawsynram bad u bah Pius Marwein MLA bad MDC jong ka Ranikor bad Langrin bad ia ka kynhun jong ka KSU la ialam da u samla Forwardman Nongrem.
Haba kren ha ki lat pathai khubor ha dien ka jingialang u bah Renikton u la ong ba ia kaei kaba ki samla ka seng KSU kila pynsngew ka long ban kin rah sha ka sorkar bad kan shong ha ka sorkar la kita ki jingpynsngew ka sorkar kan pdiang ne em.
Ka jingiakren ka long halor ka phang ba ka jingwan rung ki briew kiba na bar sha katei ka District bad kala don ruh ka jingia ai jingmut lang ha kane ka jingiakynduh kila ia pynpaw ia kawei ka jingsngew ba lada long kaba lah ba ia ki kam kiba dang lah ban kiar ka sorkar kam dei ban shah ia ki briew kiba na bar ban rung hapoh ka District.
Haba ia dei bad ka jingtrei kam jong ka Deputy Commissioner u MLA jong ka Mawkyrwat u la ai ka jingiaroh ba ka DC kala but ryntih ia ki kyndon kiba la bthah da ka sorkar bad kala buh ruh ia ka khyrdop ha Umjarain ban peit ia kiba rung ba mih hapoh ka District.
Ha dien kito ki jingjia kiba la jia hapoh ka District ka NHIDCL kala shim ia ka rai ban ai jinghikai kyrpang ia ki samla ka thain ha kaba ia dei bad ki kam ki jam khnang ba ki briew jong ka District kin ioh ia ka jingmyntoi. Na ka liang jong ka tei ka Company jong ka sorkar pdeng ka kloi ban ai bai bam haduh T.15000/- tyngka ia kito ki ban shah jied ban leit hikai kyrpang.
Haba ia dei bad kane u bah Reniktone u la ong ba un sa ia kren bad ka Company ban pynbun ia ka bhah bad pyndun ia ka jingsiew bad ka jinghikai kan long hapoh jong ka District kam dei ban long ha Guwahati.
La iathuh ba ka NHIDCL ka don ar tylli ki jingtrei kiba heh ia mynta hapoh ka District, kawei ka Surok na Ranikor sha Baghmara bad kawei na Lad Mawphlang sha Ranikor dei hangne ba ki briew jong ka kompeni ki hap ban ia rung ia mih.
U Bah Himalaya Shangpliang MLA jong ka Mawsynram, u la ong ba u la pynsngew ha kane ka jingialang ba ka sorkar ka dei ban shim shuwa ia ki briew la jong kiba don ia ka jingpynbit kaba kyrpang bad u la kynthoh ruh ba ka don ka jingduna hangne hangtai na ka liang jong ka District Adminstration hynrei kan bha ba kin khot ia kren ban ia pynbeit.
U Bah Pius Marwein MLA jong ka Ranikor u la ong ba ka jingiakren ha kane ka sngi bad ki nongialam ka KSU ka long ba na ka liang jong ki kin pynsngews sha ka sorkar bad kane ka jingiakynduh ka long ba ki baroh ki don ka jingkitkhlieh na ka bynta ka dong bad ka thain baroh kawei.
