Shillong, Nohprah 20: Mynta ka sngi ka tnad bording jong ka sorkar Meghalaya kala ia soi ia ka soskular bad ka kompeni M/S Renew Joule Private Limited ban tei ia ka jaka pynmih bor ding kaba 120 Megawatt ha ka jylla ha ki lai tylli ki jaka da kaba pyndon kam ia ka buit thymmai ia kaba la tip kum ka “ Closed Loop Vertical Turbine Project” ia kane ka soskular la ia soi ha ka jingdon lang u myntri rangbah ka jylla u Dr Mukul Sangma.
Ia kane ka soskular na ka liang jong ka tnad pynmih bording jong ka sorkar jylla la soi da ka Joint Secretary ka tnad pynmih bor ding ka Rikse R Marak bad na ka liang jong ka kompnei M/S Renew Joule Private Limited la soi da u Director u Manjoj Sompura jong kane ka kompeni kaba ma Mumbai.
Ha dien ba la ia soi ia kane ka soskular, u myntri rangbah u la ong ba “ Ngi khot ia ki were ia ki nongbei pisa ban wan seng kam ha kane ka jylla Meghalaya namar ka jylla Meghalaya ka dei ka jylla kaba biang eh ia kiba don pisa ban wan seng kam ha kane ka jylla”. Na ka liang jong u myntri rangbah u la ong ba ka sorkar kan iarap katba shah ka lynti.
U myntri rangbah u la ong ba kane ka die ka project kaba thymmai ha kaba kane ka kompeni kan sa sdang ban pyntrei ha kane ka jylla ka long kaba thymmai da kaba pyndon iam ia ka jingstad ban pynmih bor ding ia kaba la tip kum ka “Buoyancy bad Gravity”. Da ka jingwan jong kane ka kompeni kan iarap shibun ia ka jylla ha kaba pynmih ia ka bor ding eletrik.
Na ka liang jong u Director jong ka kompeni u Manjoj Sompura u la ong ba ka kompeni kan shna ia ki lai tylli ki jaka pynmih bor ding ha kane ka jylla, kin sdang ha Byrnihat ha Ri Bhoi District, nangta sha Mendipathar ha North Garo Hills District bad ha Ampati jong ka South West Garo Hills District.
La ong ba kane ka jaka pynmih bor ding kan long kaba ar ha ka pyrthei bad kaba nyngkong hapoh jong ka dewbah Asia. Ia ka jingtrei kin sa sdang ha u bnai Kyllalyngkot 2018 bad kin pyndep bad pyntrei kam noh ha u Iaiong 2018. Ka jinglut na ka bynta 1 M/W kan long kumba T.80 klur tyngka.
Ia kane ka buid pynmih bording thymmai ka sorkar jylla kan long ban iarap ia kane ka kompnei ha kaba pynioh jaka bad ia ka jinglut jingsep baroh kane ka kompnei kan beit na lade. Ia ka bor ding kaba mih na kane ka jingshna kane ka kompeni kan pyniaid iew hi da la de.
