Shillong, Naiwieng 23: Da ka jingthmu ban pynsngewthuh ia ki samla pule kumno ban pynneh pynsah ia ki jingbuh nam jong u man barim ka tnad pule ba dei ia ki kam shongkai pyrthei jong ka MLCU kala rakhe ia ka “World Heritage Week, 2018”.
Ha kane ka jingrakhe ia kane ka “World Heritage Week, 2018” la ialam ia ki samla pule kane ka skul bah sha Sohra ha ka iing mane jong ka balang Presbyterian ia kaba la tei ha u snem 1846 da ki missionary nap oh Wales. Ia kane ka iing la pynjulor da u jumai bah ha u snem 1897 ia kaba la tei biang ha u snem 1898.
U Pastor ba dei peit ia kane ka iing mane u Rev R Kharkrang, u la batai lyngkot ha kaba ia dei bad ka jingtrei jong ki missionary na Welsh bad ha ka juh ka por u la ai ka jingpynshai ruh halor ki jingkylli jong ki khynnah, la ialam ruh ia ki samla pule ha ka jaka tep ia ka kurim u Thomas Jones, Anne Jones ha u lum jingtep jong ka balang ha Nongsawlia.
Kine ki samla pule jong ka MLCU kila ioh ruh ban leit sha ka skul kaba la ai nam Thomas Jones School jong ki Mission, ia kaba la seng ha Nongsawlia ha u snem 1886 ban kynmaw burom ia u Rev Thomas Jones, u ba la tip kum u kpa ki dak khasi u ba la wan sha kine ki lum khasi ha u snem 1841.
Ki samla pule ki la leit ruh ban jngoh ia ka Sohra Police station kaba dang don haduh mynta ia ki kamra kiba la shna ban set ia ki briew ha ka por jong ki phareng kiba dang neh naduh mynta. Ki samla pule kila ioh jingshai shibun ia la ka jong ka thymmei bad ka long kaba don kam ban pynneh pynsah ia ki.
