Shillong, Naitung 29: Mynta ka sngi ha ka por san baje ei ei mynstep ki nongshong shnong jong ka Nongshiliang kila ioh ban kem ia u wei u briew u ba la prong jubor ha kawei ka iing bad kala don ka jingkynnoh ruh ba u la ktah kti ia ka trai iing kaba dei ka kynthei briew.
Ha kane ka jingiohbat ia une u briew kala don ka jingshoh jingdat na ka liang jong ki paidbah kiba la bitar ia kane ka jingleh jong une u riew sniew bad ha ka juh ka por la pyntip ruh ia kane ka jingjia sha ki pulit.
Mar ia ioh ia kane ka jingpyntip na ka liang jong ki pulit ka Nongthymmai kila leit bran bran sha katei ka jaka bad kila shimti ia u na ka kti jong ki paidbah bad la register mukotduma ruh pyrshah ia une u tei u briew.
U Superintendent ki pulit jong ka Shillong City u Bah Vivek Syiem u la iathuh ba ka dei ka jingshisha ba ka shnong Nongshiliang kala ia bot ia uwei u briew u ba la tip kyrteng kum u Derik Dkhar ba la prong tuh ha kawei ka iing bad na ka liang jong ki pulit kila kem ia u bad register mukot duma pyrshah ia u, la iathuh ba ha u ka don ruh ka wait.
Na ka liang jong u SP City u la ai khublei ia ka shnong kaba la ioh ban bat ia ki ningleh kam runar, hynrei ha ka juh ka por u la kyntu ruh ym tang ka ia kawei ka shnong hynrei ia baroh ba kin nym shim ia ka ain ha ka kti namar lada don kano kano ka jingjia ka jingeh kan poi sha ka shnong.
Ha ka juh ka por na ka liang jong u SP City u la kyntu ba ym dei ruh ban pynsaphriang ia ki Video kiba la ring ha kum kine ki jingjia, ha ka juh ka por la ban jur biang ba ki shnong ki thaw haba ki ioh ban bat ia ki nongleh kam sniew kim dei ban shah ban shim ia ka ain ha kti ki dei ban pyntip mar mar sha ki pulit haba don kino kino jingjia.
