Shillong, Naitung 22: Ki shipai Bangladesh Border Guard (BGB) bad ki pulit jong ka Ri Bangadesh kila ioh bat ia u Bah Ricky Marwein ha Bangladesh ha ka miet 21 tarik mynta u bnai bad mynta ka sngi kila aiti noh ia u sha ki shipai BSF ha Baghmara.
Ia u Bah Ricky Marwein la rahbor da ki briew kiba la kieng atiar na iing jong u ha ka 8 tarik mynta u bnai na Umsur ha ka por shiteng miet kaba hap hapoh jong ka South West Khasi Hills District bad la rah ia u sha Bangladesh da kitei ki nongrah bor.
Haba u SP News Agency u la kren ia u heh pulit jong ka South West Khasi Hills District ha kaba ia dei bad kane ka jingioh ban bat da ki shipai BGB bad ki pulit jong ka Bangladesh ia u Bah Marwein ha kaba la aiti ia u sha ki BSF kiba don ha Baghmara na ka liang jong u tei u heh pulit u la ong ba ia mynta ym pat kwah ban kren ei ei halor kane.
Na ka liang jong ki BSF, u U K Nayal PRO, haba kren ha u SP News Agency u la iathuh ba mynta ka sngi ha ka por ar baje tam kala don ka Flag Meeting hapdeng ki BGB bad ki BSF ha Baghmara bad ha dien lai baje tam ei ei ki BGB kila aiti ia u Bah Marwein sha ki BSF ha Baghmara.
