Shillong, Naitung 20: u Bah Equator L Nongrang MDC jong ka Mairang mynta ka sngi u la jop da kaba suk ia ka elekshon Deputy Chairman hapoh jong ka KHADC namar ba u Bah Morningstar Mawsor bala pynieng da ka PDA u la wengnoh ia lade na ka jingiakhun ia kane ka elekshon shuwa ban poi ka por thep vote.
Ka Protem Chairman jong ka KHADC, ka kong Telinia Thangkhiew kala pynbna hapoh ka iing dorbar ba la don ar ngut kiba la thep kyrteng ban ia khun ia ka elekshon Deputy Chairman , na ka PDA la pynieng ia u Bah Morningstar Mawsor bad na ka KHDA la pynieng ia u Bah Equator L Nongrang.
Na ka liang jong ka Protem Chairman kala pynbna ba mynta ka sngi ha ka por shiphew baje mynstep ka ophis kala ioh pdiang ia ka shithi na u Bah Morningstar Mawsor ba u la weng noh ia lade na kane ka jingiakhun ia ka elekshon Deputy Chairman da kane ka jingwengnoh jong u la pynbna ba u Bah Equator u la jop khlem da don ba ialeh pyrshah.
Da kane ka jingjop jong u Bah Equator ia kane ka elekshon Deputy Chairman ka iing dorbar jong ka KHADC mynta kala ioh ia u Deputy Chairman ha dien ba kane ka shuki kala sah thylli la palat snem.
