Shillong, Jylliew 01: U Chief Engineer jong ka tnad sam um jong ka jylla Meghalaya u Talukdar u la iathuh ba kala don ka jingjurip lang ha pdeng ka PHE bad ki shipai ia ki jaka ban pun ia ki pipe um jong ka GSWSS lyngba ki jaka jong ka Cantonment.
Haba kren ha u SP News Agency na ka liang jong u Chief Engineer jong ka PHE u Talukdar, u la iathuh ba ia kane ka jingjuriplang la leh ha kine ki khyndiat bnai kiba la dep bad ia ka kaiphot la phah sha ka tnad kam poh iing jong ka sorkar pdeng.
Ki pipe um jong ka GSWSS ki hap ban iaid lynba na Rilbong Rihno Museum, kan poi shaduh Fine Walk jan ophis jong ka Cantonment Board, ia kine ki jaka baroh la ia jurip lang hapdeng ka PHE bad ki bor shipai.
U Chief Engineer jong ka PHE u la iathuh ba na ka liang jong ka ophis kala dep ban pyndep ia ka kam jong ki bad kaba sah mynta ka long ba ki dang ai ia ka jingbit na ka tnad kam poh iing jong ka Ri India ban pyniaid ia ki pipe um lyngba ka Cantonment.
Lah ban pynkynmaw ba ha ka jingleit jurip jong u Bah Process T Sawkmie ia ka GSWSS, na ka liang jong ki ophisar jong ka PHE kila iathuh ba ka jingsah teng ka kam dei ba kim pat ioh ia ka jingbit na ka tnad kam poh iing jong ka Ri India ban pyniaid ia ki pipe um.
