Shillong, Lber 23: Ka Khasi Students’ Union (KSU) Central Executive Council ka pynrem jur ia ka jingshah dkhat jubor ka jingim jong u President ka Jaintia Youth Federation (JYF) ha ki riew bymman ha ka 20 tarik 2018.
Kum ka seng kaba don ia ka jingkitkhlieh na ka bynta ki paradoh parasnam khamtam kito ki ba ieng ha ka nongrim ban trei na ka bynta ka khia ka shon ka Jaidbynriew, ka seng ka pynpaw ia ka jingsngewsih kaba khraw halor ka jingduh noh kaba shiteng por ka Jaidbynriew ia une u rangbah uba ieng na ka bynta ka bha ka miat ki trai Ri trai muluk.
Ka seng ka kyntu bad kyrpad jur ia ki bor sorkar ba ki dei ban shim kham ha khmat ia kane ka jingjia khnang ban ioh kem noh mardor ia kine ki riewthrang snam kiba la pyniap ia utei u rangbah. Khatduh khatwai ka seng ka phah ia ka jingsngewlem sha ka iing ka sem jong une u riew rangbah bad ka seng lyngba kane ka kyrwoh ka kloi ban ai ka kti kamon ka kti kadiang na ka bynta ka JYF lada ka donkam hakano kano ka por.
