Shillong, Naitung 25:Kumba ka paw mynta ba ki nonghikai skul ha kane ka jylla Meghalaya kim don ka jingiasngewthuh jingmut hapdeng ki ar tylli ki seng ha kaba ka Federation of All Meghalaya Ad hoc Secondary Teachers Association (FAMASTA) kala shim ia ka rai ba kin nym treh ban ai ka jingkyrshan ia ka JACATAM ha ka jingiakhih ka jong ki kaba lai sngi lynter.
Ka jingialang jong ka Federation of All Meghalaya Ad hoc Secondary Teachers Association (FAMASTA) kaba la long mynta ka sngi kala shim ia ka rai ba kan nym ia shim bynta ha ka jingiakhih jong ka Joint Action Committee of All Teachers Association of Meghalaya (JACATAM). Kaban sdang ha ka 27 tarik mynta u bnai.
Ka JACATAM kala dep shim ia ka rai ba kin pynlong ia ka jingiakhih ka jong ki ka ban sdang ha ka 27 tarik bad kan kut ha ka 29 tarik da ka jingiashong kyllain mungor ban dawa na ka sorkar ba ia ki nonghikai dei ban ithuh noh da ka sorkar ia kaba la tip kum ka Provincialisation ia kajingshakri ka jong ki.
