Shillong, Lber 22: Ki Dorbar Ki Khlieh Nongsynshar Ka Ri Hynniewtrep, Ka Federation of Khasi States, ki long tang Kum ki nongpeitkai ia kane ka tamasha Election Ri India, bad haduh kine ki sngi ka long kaba lyngoh ba ym pat iohsngew ia ki kyrtong MP bad ki Seng sain pyrthei bapher bapher ba kin kren ei ei halor ki Dulir jingiateh bad ki jingkular treaty conditional Instrument of Accession and Annexed Agreement 17 August 1948.
Kum ban shu pynkynmaw ba ha ka 15 tarik May 1989 u Prime Minister barim u Rajiv Gandhi, ha ka jingkren Jong u hapoh ka Dorbar Parliament ha kaba u pynrung ia ka jingpynbeit (Amendment) kaba 73 bad 74 ia ka Article 243 u la ong ba kitei ki jingpynbeit ki ithuh ba hapoh jylla Meghalaya ki don ki Dorbar synshar tynrai (Traditional Institutions of Self Government – bad ki don ruh ki District Councils hapoh ki jaka Sixth Schedule hapoh Meghalaya bad kumta kitei ki jingpynbeit thymmai kin nym treikam hapoh kitei ki jaka.
Kaba sngewlyngoh bad kaba sngewsih ka long ba mynta la 71 snem (1948-2019) katba ha kawei ka liang ia ki District Councils la buh bynta ia ki kyrpang hapoh ka Khyrnit kaba hynriew hynrei ha kawei pat ka liang ym shym don Kano kano ka jingbuh kyrpang ia ka kyrdan, ka iktiar, upud u Sam, ka bor synshar khadar bad bishar Jong ka Sorkar ka Dorbar Federation of Khasi States, hapoh Constititution of India.
kaba kynthup khamtam ia ki (Arphewsa Khasi States – Federation of Khasi States, Ki Sirdars, ki Dolloi, bad ki Nokma) hapoh Constitution Ri India, kaba la long ka jingktah kaba jur ia ka jingiada ia ka hok Jong ka jaidbynriew Khasi kaba ritpaid kaba kyrpang, namar ka jingsahteng kitei ki Dulir jingiateh bad ki jingkular (IOA & AA- 17 Aug 2019), wat hapdeng ka jingdawa kaba Jai Jai na ka Federation of Khasi States mynta la 71 snem.
U Bah John u la ong ba la shem ba wat u ba la don bynta ha ka jingthaw ia ka Khyrnit kaba hynriew u Rev JJM Nichols Roy, ha kaba u la thoh ha ka kot tymmen ynda la dier ka por ba u la dap da ka jingkyndit ban iohi bad lap ba ha ka minute kaba khatduh namar ka jingpynibor ki Myntri Assam kaba la pynlong ia u Premiere u Chief Minister ka Assam u Shri. Gopinath Bordoloi.
U Bah John u la ong ba kala don ka jingshet kylla ban pynduh ia ki thong jong u Rev JJM Nichols Roy, uba la buh ka thong bad ong ba lyngba ka Khyrnit kaba Hynriew ban pyntylli ia ka jaidbynriew, hynrei katei ka thong ka la pulom namar ka United Khasi bad Jaintia Hills Autonomous District Council ka la pait noh ar liang.
Shuh shuh, namar ka jingkhang lad ia ka thong jong ka Federation of Khasi States, ka iohi ia ki jingtynkhuh man ka sngi ha kiba bun ki liang hapdeng ki Ain ( Central Acts, Rules, Regulations) Jong ka Ri India bad ki Ain ka Ri Khasi.
Ha ka juh ka por ka long kaba ktah jur ba ka Ain United Khasi bad Jaintia Hills Autonomous District Appointment and Succession of Chiefs and Headmen Act 1959, bad Jan baroh ki Act ki Rule ba la mynjur da ki ADC ki long bunsien kiba ia tyngkhuh bad ki Riti Dustur ka Ri Khasi, khamtam katei ka Act 1959 kaba la pynhiar kyrdan bad ktah jur ia ka long rynieng Jong ka jaidbynriew Khasi kaba la lah ban ong ba kadei ka Act kaba ktah jur ia ka hok long briew.
Ha ka kyrwoh u Bah John u la kynnoh , kaba kham ktah ha kaban iada jaidbynriew ka long ba la khang ia ki Khlieh Nongsynshar na ka sain Hima ban ia thir ia tai ban ia shim bynta ha ka sain pyrthei. Kaba kham lyngoh ka long ba katei ka Act 1959 ha kawei ka liang la khang ia baroh ki Nongsynshar naduh ki Rangbah Kur, Rangbah Shnong, Sordar Shnong, Myntri, Shnong, ki Myntri, ki Basan, ki Syiem, Lyngdoh, ki Wahadar, ban ia shim bynta ha ka sain pyrthei katba ha kawei ka liang ka Ain Election Ri India ka ong ba kan long ka Election kaba khuid bad kaba laitluid.
U Bah John u khmih lynti ia ka Sorkar Jylla ba kin pyndep bad ban pyntreikam ia ki jingiateh bad ki jingkular jong ki Khasi States, ong u Bah John Kharshiing ha ka kyrwoh kaba la phah myna ka sngi.
