Shillong, Jymmang 20: U Myntri rangbah ka jylla u Conrad K Sangma haba kren kum u kongsan ha ka jingpynkut ia ka jinghikai kaba shiphew sngi jong ka 2rd Meghalaya Battalion National Cadre Corps ha Soso Tham Auditorium Shillong u la ong ba ka jingbiang por ka long kaba don eh ha ka long briew man briew.
U myntri rangbah u la ong ba, kum ki khynnah ha kane ka por phin nym sngewthuh ia mynta ia ka jingkor dor jong ka jingialeh ban pynbiang ia ka por, hynrei ynda phi la heh la san lashai ka shisngi phin sa sngewthuh ia ka jingkor dor jong ka.
U la ong ba kum ki samla pule kiba don ha poh ka NCC, ki long kiba don bok namar ha kane ka kynhun la hikai kumno ban ia treilang kum ka kynhun, ka jinglong nongialam bad la saindur ia ka jingmut jingpyrkhat jong ki samla ha ka lynti kaba dei.
Ha ka juh ka por u la ai ka jingiaroh ia ka NCC namar kala noh syniang shibun ha ki ba bun ki liang ia ka Ri bad ia ka jylla ruh kum juh, u la kyntu ia ki nongpyniaid jong ka NCC ba kin pynlong bun sien ia kum kine ki jinghilkai.
Ha ka jingkren jong u Brigadier PM Bali, na ka liang jong u myntri rangbah u la ong ba ka sorkar kala shim khia bad ka jingiakren kala iaid ban buh ia ka kynhun NCC ha Garo Hills bad Jiantia Hills.
U Brigadier Bali, u la ong ba ka dei ka bynta jong ka sorkar jylla ban ia kren bad ka sorkar pdeng ban buh ia ka kynhun NCC ha Garo Hills bad Jiantia Hills bad lada lah ban leh kumta lah ban pynrung haduh 58000 ngut ki samla na kane ka jylla sha ka kynhun NCC.
