Shillong, Naitung 19:Ka Raid Nongtung kaba hap hapoh ka Hima Khyriem ka pyrshah jur ia ka jingleh ka Assam ban wan buh da ka sign board ba la thoh ‘Welcome to Karbi Anglong, Assam’ ha shnong Sabuda, Ri Bhoi District.
Haba kren bad u Secretary ka Raid Nongtung Bah Heronice Masharing, bad u Peiem Miniwel Shadap u Syiem ka Raid Nongtung ki la pynpaw ba katei ka jingthmu ka Assam ban buh da ka sign board ha Sabuda ka pawshai ban kam trai syndon ia katei shnong bad kiwei ki shnong ba marjan.
U Bah Masharing ula ong balei ka Assam ka wan buh sign board ha Sabuda haba ka dang don ha ka jingiaknieh hapdeng ka Meghalaya bad ka Assam, “katba ym pat lah ban pynbeit ia u pud u sam ka Assam kam dei ban buh sign board ioh ka ialam bakla ia ki paidbah”.
Ha kajuh ka por, ka Raid Nongtung ka la kyrshan ia ka KSU Raid Nongtung Unit bad ki dkhot ka KSU-NKH kiba la leit ban pynpra ia katei ka sing board ha ka 10 tarik mynta u bnai.
Kumjuh ka Raid ka la kyntu ia ka sorkar Assam ban sangeh shwa ia ka jingthmu ban buh ia ka police Out post ha shnong Umru.
Shuh shuh u bah Masharing ula ong katkum ka Notification ba la pynmih da ka sorkar Assam kaba dated 15/04/1951 ka kdew shai ba u pud sam jong ka Assam u dei na Umiam, Umket sha Umkhen (shakhmat Ummat) haduh Umtarshing Shangka Hulo u pud bad ka Jaintia Hills District.
“Katkum katei ka notification ka Block-II ka dei ka Umpanai, Umswai, Umbermon, Bisinki haduh khap Neli katba ki shnong kynthup ka Ummat, Jatalong, Sabuda, Umwang, Khlieh Umwang bad Umtlieh ki hap hapoh ka KHADC ym ha KAAC hynrei shu klun jubor da ka Assam” ula ong.
