Shillong, Jymmang 29: U symbut myntri rangbah ka jylla u Bah Prestone Tynsong mynta ka sngi u la plie ia ka “Meghalaya Skill Competition 2018” ha Government Industrial Training Institute, Rynjah. Ha ka jingkren ka jong u kum u kongsan ha kane ka sngi u la ong ba ka jingeh ha kine ki sngi ka long ba ki samla ki ialeh ban wad tang ia ki kam sorkar.
Ki samla kim shym la pyndon kam ia ka sap ka phong kaba ki don ban ieng hala ki jong ki kjat. U la ong ba ka rukom pyrkhat ki kmie ki kpa ki long ban phah ia ki khun jong ki sha skul ban ioh ia ka jingnang jingstad bad ba kin ioh ia ka kam sorkar, kane ka long ka daw bah jong ka jingdon ki samla khlem kam.
Na ka liang jong u symbut myntri rangbah u la kyntu ia ki samla ba kin pyndon bha ia kane ka jinghikai kaba ki ioh kaba long kawei ka lynti jong ka jingiakop bad ba kin shim ia kaei kaba la hikai na ka bynta ban ki kiew ha ki sngi ki ban wan. U myntri u la ong ba ka pisa kam don jingeh ban ioh ban seng ia ka kam da kaba shim ram na ki bank. U myntri u la kyntu ba kin leh bha ha kine ki jingiakop ha ki sngi kiba dang sah.
Ha ka jingkren jong u MS Roa Additional Chief Secretary u la ong ba ia ki nongjop ha kane ka jingiakop yn ai ka jingiarap da ka pisa bad lada ki leh bha yn jied ia ki ban phah sha Russia ha u snem 2019. Baroh kiba la wan ban ia shim bynta ki long 140 ngut ki samla bad u la kitbok ia ki ba kin leh bha ha kane ka jingiakop. Kiwei kiba la ia don lang ha kane ka sngi ki long u Director of Employment badCraftsmen Training, u B. Hajong.
