Shillong, Nailur 09: Da ka ba shimkhia khnang b
an kyntiew ia ka jingnang jingstad jong ki samla hapoh ka thain, Ka Khasi Students’ Union Tyrsad Circle sa shisien pat ka la ioh ban pyn kup burom ia ki samla pule jong ka thain Tyrsad kiba la wan sha khmat ha ki jing pule jongki ha ki kyrdan bapher-bapher Da ka Maitshaphrang Excellency Award 2018.
Ia kane ka jingialang pynkup burom la pynlong ha ka sngi Saitjain ha Skul Seng Khasi Secondary School Tyrsad , ha kaba kane ka sngi u Samla Donald V.Thabah General Secretary ka KSU Sengkmie u la long kum u Kongsan katba u Bah Lamphrang Blah MDC jong ka Thain u la long kum u symbud kongsan Bad la pynphuh pyn phieng ia kane ka sngi da ka jing ia sakhi lang ki Dkhot ka KSU Sengkmie, U Rangbah Shnong bad Secretary Shnong jong ka Shnong Tyrsad Umkseh, ki Khynnah Skul,ki Nonghikai,ki longkmie longkpa jong ka Thain baroh kawei bad ia kane ka jing ialang pynkup burom la pyniaid da u Samla Khrawphyrnai Rynjah General Secretary KSU Tyrsad Circle.
Ha kane ka sngi la ioh ia ka Jing kren Maitphang da u President jong ka KSU TYrsad Circle u Samla Pynshaiborlang Rani u la ong Ka jingthmu ba nyngkong jong ka seng ka long ban ai mynsiem ïa ki samla pule ba ki dei ban ïaid beit sha ka thong, kim dei ban kynran dien. Ka jingstad ka long ka waitlam bad ka stieh na ka bynta ka lawei jong ka jaidbynriew. Kumta ki samla pule ki dei ban trei minot ban ioh ïa ka nam ka burom ïa ki hi, ïa ki kmie ki kpa, ïa ka imlang sahlang bad ïa ka jaidbynriew hi baroh kawei.
U symbud Kongsan uba long ruh u MDC jong ka Thain u la kyntu ia ki samla pule ban iai minot shuh-shuh khnang ban lah ban kyntiew ia ka jingim jong ki ha ki sngi bad kipor ban dang wan u la ban jur ruh ia baroh ban kyntait war ia ki jing sniew kiba ap ha ka jingim jong ki u la ban jur ruh ia ka KSU Tyrsad Circle ban dang iai bteng kum ia kine ki jing pynkup burom namar lyngba kane ka ai mynsiem shisha ia ki Samla Pule.
Katba U Samla Donald V.Thabah General Secretary KSU sengkmie u la ong ba u don ka jingngeit kaba skhem ba ki samla ki long ka lawei baphyrnai jong ka jaitbynriew bad ka jingnang jingstad kum ka atiar ban kynjoh sha ka. Dei lyngba ka jingroi ha ka jingnang jingstad ba ngin sa lah ban kyntiew ia la ka ri bad jaitbynriew.
Kumta Ka seng ka pynshlur bad ai mynsiem ruh ia ki ba dang don hapdeng ki jingpule jong ki bad ka kyntu ba kin trei shitom khnang ban ioh kheit ia u soh ka jingjop ha ka jingim bad ka jingpule jongki.Ka jing bym don ka jongngi ia ki briew kiba dei ki Trai ri ha man la ki department bapher-ba pher jong ka Sorkar Jylla ka wan rah jingeh shibun namar ki briew kiba wan na kiwei pat ki jylla ki ioh ban pyn iaid bad leh katba ki mon namar kine kin ym sngewthuh ia ka jing eh bad ka jing ia kynduh jongngi kum ka Jaitbynriew.
U la bynrap ruh ia ki Samla Pule ba kane ka jing pynkup Burom kam dei ka jingkut jong ka jing pule hynrei ka dei u Mawjam ban dang kiew sha ki kyrdan ba kham shalor bad u la ban jur ba haba phi la ioh ia ka jingnang jing stad ba pura phim dei pat ban long ki kruin ban bam duh lane ban long pyrshah ia ka Jaitbynriew hynrei ki dei ban noh synniang ia kaei-kaei kaba bha tam na bynta ka Jaitbynriew khnang ban kan dang kiew kham sha jrong.
Ha kane ka sngi la ioh ruh ka jing kren na i wei i samla Pule i ba la pyndep ia ka Doctorate of Philosophy na ka Department Geography na ka Skul Bah NEHU i Dr.Jane Eufemia Warjri ha kaba i la ai jingmut ia ki khynnah skul,ki samla pule bad ia ki kmie ki kpa ba kumno ban nang ban jied ia ki lain jong ki ban pule ym ban shu shah pynbor da mano-mano namar kane kan buh jing eh kylla ia ki khynnah pule.
Ki kmie ki kpa ki dei ban ai kylluid mynsiem ha ki khun ban jied ia ka ka jing pule kat kum ka jing sngewthuh jongki khnang ba kin lah ban pyndonkam hok ia ka sap jongki ha ka lashai la shi sngi. Namar kam mut ba baroh kiba ioh first class ki hap ban leit pule ha Ka science Stream. Bad kam mut ba baroh ki ba pule arts Stream ki dei kiba duna ka jingtip bad jingshemphang ha ki.
Kine ki dei ki rukom pyrkhat kiba bunsien ki ialam bakla ia ki khynnah bad samla pule. Da phi lah pule kham shajrong phin sa sngewthuh ba lada phi pule ia ki subject geography history bad kiwei de ki social science subject phin shem ba ka sobjek science bad ka jingkhein ki dei ki thied tynrai jong kiwei pat ki subjects.
U la ai jingmut ruh ba man ki skul ki dei ban don ia ki Library kaba biang khnang ba ki khynnah skul kiba wan na ki long iing ki bym da biang ka jingmih kin ioh ka lad ban pule mar kumjuh bad kiwei pat I ne i samla pule i kren bynniaw ruh halor ka jing bymdon ka jylla jongngi wat tang kawei ruh ka State University ka ban ai ia ka jing shakri ba pura ia ki Samla Trai ri kiba thrang hok ban pule ha ki kyrdan ba kham sha jrong.
U la bynrap shuh-shuh ba Ka jylla ka donkam ia ka Education policy kaba biang. Ka jingieh noh skul ki khynnah ka dang kiew ha ka jylla jong ngi kat kum ka report jong u snem 2016-2017 ba la pynmih ha ki lad pathai khubor. kaei ka daw ba ki hap ban ieh noh ïa ka skul shiteng por bad shano kine ki khynnah ki leit bad ki trei ki ktah aiu? Nga ngeit ba kawei na ki daw ka dei ka jing rem palat ka bai skul.
Mynta lada don kiba tbit ban hikai ruh hynrei kat kum ka rule kiba mynta ki hap pyndep ia ka b.ed. Don kiba don ka sap ban hikai kim ioh lad ban pyntbit ialade namar ba rem ka jingsiew ban leit pule b.ed. Ngi kyrmen ba ki bor ba halor kin shim ki lad ki lynti ban khmih bniah ha kaba iadei bad kane ban plie bun ki lad na ka bynta ki khynnah bad samla ha kiba bun ki liang kiba long ka lawei ka Ri. Kane ka samla ka la ai khublei ia ka KSU Tyrsad ba kan dang trei shitom shuh-shuh ban dang kyntiew ia ka thain Tyrsad baroh ka wei ha ka liang ka jing nang jing stad khnang ban mih ki khlur ki ban tyngshain ym tang ia ka Thain hynrei ban ialam ruh ia ka JaitBynriew.
ki samla kiba la ioh ka jing pynkup burom na ka KSU ki kynthup ia u Moundlystone N.Sohlang, Balakyrmen Marbaniang,Sandalin Kharsynniang,Dikostar Jaba,Erimonya N.Sohlang,Airisha Umdor,Juness Jone Hynniewta,Banriakor Marbaniang,Profesion Kharryngki,Ibabettishisha Jala,Willey Reade Jaba,RoseStar Sing Khasain,Pynsuklin Mawlong bad u Samla Dakynmawlang Warjri .
Ka Seng kum ka jing ai mynsiem ka la ai kyrpang ruh ia ka Khusnam Riew shlur Ia lai ngut ki Dkhot jong ka KSU Tyrsad Umkseh Unit kiba kynthup ia u Samla Rangkynsai Rynjah,Samla Spailet Rynjah bad u Samla MorningStar Rynjah namar ki kam shlur jong ki kiba la pyn i kaba la long ka Nuksa ba bha ia kiwei pat ban don ka Mynsiem ba shynrang bad ka bym ju salia la ha kano-kano ka bynta ba ki ia kynduh.
