Shillong, Nohprah 19: Ka Press Information Bureau, Shillong ka la pynlong ia ka Vartalap, ka workshop ban iasam jingtip hapdeng ki nongthoh khubor kaba la long mynta ka sngi ha Shillong Club. Ki nongthoh khubor na ka electronic bad print media, na kylleng ka nongbah bad ki District ba marjan ki la iashim bynta ha kane ka workshop.
Haba ai jingkren ha ka jingialang plie, u B D R Tiwari, Secretary Planning, sorkar Meghalaya, u la ai jingiaroh ia ka jingpyrshang jong ka PIB bad ong ba kum kine ki prokram ki long kiba donkam bha ha ka ban iasam jingtip halor ki jingthmu jong ka sorkar, ki prokram bad ki scheme sha ki paidbah lyngba ki lad pathai khubor. “Baroh kine ki scheme la leh na ka bynta ka bha ka miat jong ki paidbah hynrei ki jingmyntoi jong kine ki prokram bad ki scheme yn ym lah ban wanrah lada ki paidbah kim don jingtip shaphang ki prokram. Kumta ka long kaba kongsan ban don ki jingsam jingtip sha ki kyndong kynshrot jong ka ri,” u la bynrap.
U Dr Tiwari u la ong ba ka teknoloji kum ka GST ka la kyntiew ia ki tnad treikam sorkar bapher bapher da kaba pynlah ia ki ban phaikhmat kham bha sha ka “jingioh jong ki birew ia ki jingmyntoi ym ia ki rukom treikam.” U la ong ruh, “Ka la don ka jingkiew bha ha ka rukom pyndonkam ia ka teknoloji dang shen ha ki lad pathai khubor. Ki lad pathai khubor mynta ki la iaid ha ka rukom kaba thymmai bad ki briew mynta ki kham beh ia ki lad pathai khubor lyngba ka teknoloji bad kane ka la pynlong ia ki lad pathai khubor ba kin pdiang mar mar ia ki teknoloji kiba thymmai.”
U Dr Tiwari u la ong ruh ba donkam ban kyntiew ia ka imlang sahlang khnang ba kane kan plie lad ia ka roi ka par ha kane ka jylla jong ngi. U Tiwari u la iaroh ruh ia ki riti ki dustur jong kane ka jylla, u la ong ba kine ki rukom treikam barim ki la pynsuk ia ka sorkar ba kan wanrah ia ki scheme bapher bapher na ka bynta ka roi ka par ha ka jylla.
Ha ka technical session, u A K Paul, Assistant Commissioner, GST Shillong u la ong ba ka Goods and Services Tax (GST) ha ka jylla Meghalaya ha kine ki hynriew bnai ba la leit ki la long kiba jop. Da ka jingpyntreikam ia ka GST, ka la don ka jingmyntoi kaba khraw ha ka bai kit bai bah ia ki mar hapdeng ki jylla bapher bapher kaba la ialam sha ka jingduna duna jong katto katne ki mar, u la ong. U Paul u la pyntip ha ka jingialang ba T. 266.46 klur la ioh lum hadien ba la wanrah ia ka GST ha Meghalaya katkum 30 tarik Naiwieng, 2017.
“Dei na ka jingkhang ia ki katto katne ki toll gate hadien ka GST, ka jingshim por jong ki trok kit mar ban iaid na Byrnihat ha Ri-Bhoi district sha New Delhi ka la duna na ka san sha ka lai sngi,” u la bynrap.
Haba ai jingiaroh ha ka liang ka khaii pateng ha ka jylla, u la ong, “Ki nongkhaii kiba la don lypa ha ka jingsiew khajna ki dap da ka jingsngewkmen kaba khraw namar ka rukom pyntreikam kaba suk jong ka GST katba kiba na shabar kane ruh ki la iasoh bad kane ka rukom treikam.”
Halor ka jingkylli la ki nongrep kin lait ban siew khajna hapoh ka GST , u Paul u la ong ba ki autonomous district council (ADC) bapher bapher ki don la ka bor ban lum khajna ia katto katne ki mar.
Shuh shuh, u Paul u la pyntip ha ka jingialang ba la pynkhreh ia ka e- way bill system ha ka ri baroh kawei bad kan sdang kum ka jingpyrshang hapoh 16 tarik Kyllalyngkot, 2018 na ka bynta ka jingshalan ia ki mar na kawei ka jylla sha kawei pat, ban pynsuk ia ka rukom siew khajna. Na ka bynta ka intra-state transportation of goods, kin don la ki jong ki e-way bill system ha ki jylla bapher bapher. U la pynshai ruh ba watla ka la don ka jinghiar dor ha ki katto katne ki mar hadien ka jingpyntreikam ia ka GST, ka long kaba bakla ban khmih lynti ia kano kano ka jingktah ha ki dor jong ki jhur, kaba kiew bha mynta. “Ki don shibun ki jingeh ba iadei bad ki dor jong ki jhur bad ym GST ha ki jhur, lait noh kiba la song paket,” u la ong.
U Bah Mang Pariat, Superintendent of Taxes, Circle 2, Shillong, ha ka jingai jingbatai jong u, u la ong ba ka jingwanrah ia ka GST ka la pynduna ia ka jingkiew dor, ka jingsuk ha ka khaii pateng bad ka jingduna ha ka ‘Black’ transaction. U la ai jingbatai ruh halor ka khaii pateng hapoh ka GST ha Meghalaya.
Hadien ka jingbatai la don pat sa ka jingiaphylliew jingmut ha kaba ki resource person ki la lah ban pynshai shibun ki jingkylli ba la kylli da ki nongthoh khubor. Ha kane ka workshop la iadonlang u Daniel Ingti, Director of Natural Resource Management wing jong ka Meghalaya Basin Development Authority (MBDA) bad u J Gangte, Head of Office, North Eastern Service, AIR Shillong.
