Shillong, Risaw 27: U Executive Member jong KHADC u bah Martle N Mukhim ba dei peit ia ki kam pynroi haba jubab ia ka jingkylli jong u bah Lamphrang Blah nongialam ka liang pyrshah hapoh ka iing dorbar u la iathuh ba ka KHADC kam shym ioh shuh ia ki skhim na ka Articles 275 dei naduh u snem 2017.
U bah Mukhim u la iathuh hapoh ka iing dorbar ba ka sorkar jylla man la u snem ka pan na ki District Council ban phah ia ki skhim sha ka sorkar jylla lyngba ka tei ka Articles 275 hynrei naduh u snem 2017 haduh mynta khlem ioh ei ei bad kane kala shu pynbun kam kai ia ki District.
La iathuh hapoh ka iing dorbar ba dei ha Nailur mynta u snem ba u la thoh da ka D.O Letter sha u Commissioner bad Secretary jong ka sorkar jylla ha kaba ia dei bad kane namar ia ka jingmang pisa dei ban leh da ka sorkar jylla.
La iathuh hapoh ka iing dorbar ba ia kane ka kam un sa ia kren bad u CEM ba kin wat ki lad ki lynti kumno ban pynioh ia ki skhim na ka sorkar pdeng, kumba ka long mynta ka sorkar jylla kam shym la mang pisa ei ei ruh em sha ka KHADC na kane ka Article 275.
U bah Paul Lyngdoh EM ba dei peit ia ka Town Committee haba jubab ia ka jingkylli kaba la wanrah da u Bah R V Lyngdoh halor ka Tpwn Commitee, u bha Paul u la ong ba ka KHADC kala dep ban pynmih ia ka jingpynbna paidbah ba la thaw ia ka KHADC Building Structure Regulatory Authority bad kane kan pynkhreh ia ka Building Bylaw.
U bah Jambor War EM ba dei peit ia ki kam Elaka haba jubab ia ki jingkylli jong u bah Lamphrang Blah ha kaba ia dei bad ka Hima Nongspung haba jied ia u Syiem, la ong ba kumba ka paw na ki jingthoh ba naduh u snem 1961 kiba shah jeid Syiem hapoh kane ka Hima ki dei na ka jaid Syiemiong.
Ka kong Grace Mary Kharpuri EM ba dei peit ia ki Iew ki hat, haba jubab ia ka jingkylli jong u bah Lamphrang Blah kala ong ba ka KHADC ia mynta kam don kano kano ka jingthmu ban seng iew thymmai bad ka jingtrwa kaba la wan dei na ka Hima Mylliem, halor ka jingkylli jong u bah Karnes Sohsang ka la ong ba ka KHADC ka kwah ban don ia ki iew ha baroh ki District ka shong ha ka jingdon ka pisa.
