Shillong, Risaw 28: U Chief Executive Member jong ka KHADC u bah Titosstarwell Chyne haba jubab ia ka mat ia kren kaba la wanrah da u bah Fantin J Lakadong ha kaba ia dei bad ka jinglait ka Radiation ha Domiasait, u CEM u la ong ba u la dep ban kren shai ba kin nym ai NOC ha kaba ia dei bad kano kano ka kam haba ia dei bad u Uranium.
Na ka liang jong u CEM u la pynkynmaw ba ha ka 22th Rymphang 2017, ka iing dorbar jong ka KHADC kala shim ia ka rai ba ka Executive Committee kan nym lah ban shim ia kano kano ka rai ha kaba ia dei bad ka kam Uranium khlem ka jingiamynjur lang jong ka iing dorbar.
Haba ia dei bad ka jingkynnoh ba kala don kata ka jinglait ka Radiation na ki top kiba buh ia ki jaboh jong u Uranium thain Domiasiat, ka EC kala iohi ba ka sorkar kan thung ia ka Expert Committee ban wat bniah halor kane ka bynta bad kin dang ap ia kane ka kaiphot.
Hynrei kumba la kren na ka liang jong ka KHADC dalei lei kan nym ai jingbit ban tih Uranium ha ki jaka kiba hap hapoh u pud u sam jong ka KHADC, na ka liang jong ka EC kan sa thoh sha ka sorkar jylla ba kan phah kotpi lang ia ka kaiphot sha ka KHADC ia ka jinglap ka Expert Committee.
Haba ia dei bad kane ka KHADC kan sa thung ia ka kynhun ki MDC ban leit sha katei ka jaka ban lap ia ka jingshisha bad ha ka juh ka por lada lah ban buh ia kata ka kynhun riew stad ha kaba ia dei bad kane ka kam bad ha dien ba la ioh ia ka kaiphot yn sa shim ia ka rai.
Ha ka juh ka por u la buh ia ka jingkylli hato ka long shngain ne em ban leit sha kato ka jaka kum ki riew paidbah, na ka liang jong ka KHADC kan sa ia treilang bad ka sorkar halor kane kumno ban leh.
Ki dkhot jong ka iing dorbar kiba la ia shim bynta ha kane ka jingiakren halor kane ka mat nalor u MDC ba wanrah ia kane ka mat ia kren ki long u bah Karnes Sohshang, Lamphrang Blah, Gabriel Wahlang, Banjop Pyngrope, PN Syiem, Lambor Malngniang, Bindo M Lanong bad u bah Titosstarwell Chyne.
