Shillong, Naitung 25: U Bah Pynshngian N Syiem Chief Executive Member (CEM) jong ka Khasi Hills Autonomous District Council (KHADC) u la pyntip ba ha ka jingialang bad ki heh jong ka National Highway Infrastructure Development Corporation (NHIDC) Limited u la kren shai ba kin nym lah ban ai ia ka No Objection Certificate (NOC) ia ka surok ban leit na Wahkaji sha Mawthabah.
Haba kren ha u SP News Agency lyngba ka phone na Delhi la iathuh ba ka daw jong ka jingbymlah ban ai ia ka NOC ia kane ka surok ka long namar ba ka don ka jingkynrum kynram ha kaba ki paidbah ki pyrshah katba ia kiwei pat ki surok ka Executive Committee jong ka People Democratic Front kan sa shong ban ia pyrkhat.
Lah ban kdew hangne ba ki surok kiba la don ha skhim jong ka sorkar pdeng ki long ka surok na Nongstoin sha Hahim, na Nongstoin Kyrshai sha Assam bad na Nongstoin sha Wahkaji bad Mih sha Ranikor haba ia dei bad kine ki surok na ka liang jong ka PDF kan dang ia shong ban pyrkhat.
Ha kane ka jingiakynduh ia kiheh jong katei ka company la don lang ruh u Bah Hedrain Lyngdoh Chairman jong ka Committee ban peit ia kitei ki surok bad u bah Awrin K Sutnga Kum u muktiar ruh u la don lang ha kane ka jingialang.
