Ka KSU kan leit ban ia shim bynta ha ka jingkhot iakren ka sorkar la sngi Balang

Shillong Naitung 17: Kumba ju leh man la ka snem, hynne ka sngi ruh ka KSU kala kynmaw burom iaka lyngkhuh sngi iap ba 182 jong u Tirot Sing Syiem, u Syiem ka Hima Nongkhlaw, ha ka jingialang kaba la long ha Madan Iewrynghep, Laitumkhrah kaba don u mot sahnam jong u riewkhraw ka jaidbynriew.

Ki nongialam ka KSU kiba mynta bad kiba rim kila ïashimbynta shitrhem ha ka jingkynmaw  burom ia u khla wait ka ri, da kaba buh syntiew ha ryngkat bad ka jingsngap jar kaba shipor.

U President ka KSU u samla Lambokstarwell Marngar ula pyrto iaka jingshlur u Syiem Tirot Sing uba la ialeh pyrshah iaki dohlieh na ka bynta ka dawbah jong ka jaidbynriew bad ym shim la treh ban long u Syiem Mraw ban shah pyniaid ha ki phareng.

“Ka seng kan leit ban iashimbynta ha ka jingkhot iakren ka sorkar la 19 tarik mynta u bnai, hynrei ngi kren da kaba shai ba lada ka sorkar ka shim iaka rai kaba bakla, ka KSU kan mih noh na ak jingialang bad kan pynjur shuh shuh iaka jingïakhih ban pyrshah ban shna iaka lynti rel” ong u Lambokstarwell Marngar.

Une u nongialam ula ong ruh ba ha ka jingpyrshah iaka lynti rel haduh 26 ngut ki dkhot ka KSU kila shah kem bad bun ki dang shah thwet ha ki pulit, hynrei ki dang don da ki hajar ngut ki dkhot ka seng kiba la kloi ban len iala ka jingim na ka bynta ban iada iaka ri bad ka jaidbynriew.

Ula ong ba ka sorkar Congress kala pyrshang katba lah lyngba ka  Northeast Frontier Railway (NFR) ban wanrah iaka lynti rel ha ka jylla, hynrei ka KSU kan ieng pyrshah iaka lynti rel katba ym pat don ia ki ain ban pyrkhing iaka jingwan jingmih ki bar jylla bad ki Mynder ri

“Lada ka jingïakhih ka jongi ka poi shaduh u pud jong ka jingiaumsnam, u Myntri Rangbah ka jylla bad ka kynhun myntri ka jongu, kidei ban shim iaka jingkitkhlieh” la byrngem u President ka KSU.

Ha kane ka jingialang la iadonlang u General Secretary ka KSU u samla Donald V Thabah, ki President barim ka KSU u bah Samuel Jyrwa bad u bah Daniel Khyriem bad kiwei kiwei ki nongkitkam barim bad kiba mynta kiba la wan na ki circle bad ki unit bapher bapher.

 

What Next?

Recent Articles

Leave a Reply

Submit Comment
*