Shillong, Iaiong 15: Ki paitbah bad ki Rangbah Shnong jongka South West Khasi Hills District ka ka jingkyrshan lang jongki sengbhalang bapher bapher ba don haka District haka 13 tarik jong mynta u bnai ka la ioh ban thaw iaka Kynhun ba la tip kum ka Mawkyrwat Electricy Consumers Forum (MECF) haka jingialang ba la iadon lang daki nongialam shnong, ki paitbah nongthang light bad kiwei kiwei ki sengbhalang.
Ka jingialang ba la pynlong ha kato ka sngi ka long kum shibynta ban pynpaw pyrshah iaka jingbymkhein snep jongka MePDCL iaki paitbah nongshong shnong hapoh ka thain ha kaba ki la iaid lait naki paitbah hashwa ban aiti iaka jingpynbiang light Shaka Company napoh Orissa ba la tip kyrteng kum ka Feedback Energy Distribution Company limited ( FEDCO) ha kaba Kane ka company ka la dei ban shimti iaka kam hapoh ka Mawkyrwat Division naduh mynta u bnai Iaiong.
Ki paitbah bad nongialam shnong ha ka jingialang ba la pynlong ha kato ka sngi ki la shim ia kine ki rai ba lada ka MePDCL kam pat pynsngew paitbah iaka Memorandum of Understanding hapdeng jongka bad ka FEDCO bad katba kam pat wan ban pynshai iaki rukom treikam ba kane ka Company kan leh nangne shakhmat bad ba ki paitbah kin shim rai halor kane ngin nym pat shah ba ka FEDCO kan iaid shakhmat iaka kam.
Ki paitbah ki la dawa ruh ba ka FEDCO kan sangeh shwa iaka jingthungkam thungjam hapoh ka thain bad ka la kyntu ruh iaki paitbah ba kim patdei ban Siew bill lights haka kyrteng jong kane ka Company katba ka MePDCL kam pat pynshai bniah halor kane ka bynta.
Shuh shuh naka liang jongki nongialam shnong bad ki paitbah ki la shim iaka rai ban leit tied iaka jingkhang jong u James Sangma, myntri ba dei peit ia ki kam bording jong ka sorkar Meghalaya ban pynsngew iaki jingeh jongki paitbah halor ka bording bad ban dawa ruh iaka jingtuklar jong u halor kane ka bynta.Kane ka long ka kyrwoh na u Bah Wallambok Syiemiong, Chairman MECF bad u Bah Deling Snaitang, Secretary MECF.
