Ka NFR ka dei ban burom ia ki rai jong ka sorkar jylla bad KHADC ong ka KSU

Shillong, Risaw 31: Halor ka jingmih ha ki katto katne ki lad pathai khubor ha kaba la paw ba ka North East Frontier Railways (NFR) ka la leit ban ia kynduh ia u Governor ka jylla Meghalaya ban pynbeit bad pynkloi noh ia ka jingshna ia ka lynti rel ha ka thain Ri Bhoi bad East Khasi Hills, ka Khasi Students’ Union (KSU) lyngba kane ka kyrwoh ka phah khubor sha ka NFR ba kam pat dei ban kyrkieh ia ka jingthmu ban wanrah ia ka rel sha kine ki thain katba ka sorkar jylla kam pat lah ban wanrah ki ain ki kanun ki ba khlain bor bha kiba lah shisha ban teh lakam ia ka jingwan rung ki briew ba nabar sha kane ka jylla.

Ka jingkwah khah khah ka NFR ban wanrah ia ka lynti sha kine ki thain ka la poi haduh u pud ba kam khein snep shuh ia ka Khasi Hills Autonomous District Council (KHADC) ka ba khlem ai ia ka No Objection Certificate (NOC) ban iaid shakhmat ha ka ba ia dei bad ka jingpyntrei ia ka lynti rel. Shuh shuh ka jingleit mih ka NFR sha u lat ka jylla ka pynpaw ruh ba kam khein snep ruh wat ia ka rai jong ka sorkar jylla. Ha u 19th July 2017 u myntri rangbah ka jylla u Dr. Mukul Sangma u la pynbna lyngba ki lad pathai khubor ba ia ka Railway Project yn pynsangeh shwa tad haduh ynda la pynbeit da kumwei.

Ka KSU halor kine kiei kiei baroh ka kyntu ia ka NFR ba ka dei ban burom ia ki rai  jong ka sorkar jylla bad KHADC bad ka seng ka pynpaw ruh ba da lei lei ruh em ka seng kan ym ailad ia ka jingpyntrei ia ka lynti rel ba kan iaid sha khmat wat lada ka sorkar ka thom biang da ka bor kumba ka la jia ha kine ki khyndiat bnai kiba la dep. Ka seng ka pynsngew ruh sha ka sorkar jylla ban pynshai ba balei haduh mynta ka jingpyntrei kam ia ki Entry bad Exit Points kam pat urlong.

 

What Next?

Recent Articles

Leave a Reply

Submit Comment
*