Williamnagar, Naitung 02: U myntri rangbah jong ka jylla u Dr Mukul Sangma haba kren ha ka jingleit jngoh ka jong u ia ka skul kaba don ha Williamnagar ia kaba la tip kum ka Educere Higher Secondary School ban ia kren bad u nongseng ia kane ka skul u Gamchi Tamrey R. Marak, ki nonghikai bad ki khynnah skul ha ka jingiadon lang ki kmie ki kpa ban plie ruh ia ka iing skul kaba thymmai ia kaba la bei pisa na ka skhim Chief Minister’s Special Urban Development Fund.
Ha ka jingkren jong u myntri rangbah u la pynpaw ia ka jingsngewnguh ka jong u ia ki nongseng ia kane ka skul kaba ki la lah ban kyntiew haduh katne na ka bynta ban ai ia ka jingnang jingstad sha ki khynnah katei ka thain da ki jinghikai kiba biang wat hapdeng ki jingeh kaba ki ia kynduh bad kane ka skulk ala rah nam ruh ha kiba bun ki liang.
U myntri rangbah u la ong ba na ka liang jong ka sorkar jylla ka phai khmat mynta sha ka thain Westkhasi Hills bad East Garo Hills ban kyntiew ia kane ka dong bad ka thain naduh Mairang, Rongjeng bad Williamnagar ter ter sha duh ki lum Durama. U la ong ba shen bun kiei kiei na kin sa urlong ha kane ka thain ha ki kam pynroi baroh.
U myntri rangbah u la ai ka jingithuh ba ki jaka ai jinghikai, ka dei kawei na ki jaka ba la ai kam ai jam ia ki briew bad u myntri rangbah u la ong ba kan bha lada ki skul ki lah ban ai ia ki kam hikai sha ki khynnah skul kiba pass na ka juh ka skul ba kin don ia ka jingsngew long trai ha la ka jong ka skul kaba ki la pass ba kin lah ban aiti ha ka kam.
Ha ka juh ka por u myntri rangbah u la kren diaw bad pynpaw ia ka jingsngewsih ka jong u ba ka jylla kam shym la lah ban leh ei ei ha kaba ia dei bad ka pule puthi ha kine ki snem kiba la leit noh wat la ka jylla kala ioh ia ka nam kum ka pdeng jong ka jaka ai jinghikai shuwa ba ka Ri India kan ioh ia ka jinglaitluid. Ka jingbym don ia ki jaka pule kiba biang kala pynlong ia ki khynnah samla kane ka thain ba kin leit sha bar ka jylla ban leit pule. Ka sorkar mynta ka peit ia ka kam pule kum kawei na ki jaka ba ka sorkar kan bei pisa ban wanrah ia ka jingnang jingstad ha ka jylla.
Ha kane ka sngi la synran lang ia u myntri rangbah ka jylla da ka myntri ba dei peit ia ki kam skul ka Deborah Marak , u Parliamentary Secretaries Brigady Marak, Cherak W. Momin, Sengnam Marak bad Marthone J. Sangma . Ia ka Educere school la seng ha u snem 1994 ha kaba ki la don tang 100 ngut ki khynnah skul bad mynta kane ka skul ka long kawei na ki skul kaba pawnam ha Eat Garo Hills.
