Shillong, Lber 27: U Myntri rangbah ka jylla u Conrad K. Sangma, ha ka jingiakynduh bad ka kynhun na ka “State Coordination Committee of Coal Owners and Mine Dealers Forum” u la ong ba ka sorkar kan pule bniah ha kaba ia dei bad ka jingkhang tih dewiong ka NGT ha kane ka jylla bad kan sa iaid sha khmat kumno ban leh ia kane ka kam.
Na ka liang jong u myntri rangbah u la ong ba kane ka kynhun kaba la leit ban ia kynduh ia u ia kaba la ialam da ka kynhun jong ki myntri sorkar, la ong ba ka sorkar kan sa thaw ia ka kynja kommitti ban peit ia kane ka kam kaba kynthup na ka tand ain, ka tand marpoh khyndew, na ka tnad khlaw bad kum juh na ka tand kam poh iing ban peit bniah ia kane ka kam.
Ha dien ba la leh ia kane ka sorkar kan sa ioh ia ka jingshai bad ha ka juh ka por kan dang ruh ka jingiakynduh ia ki briew kiba don bynta ha kane ka kam na ka bynta ban pynkhreh kumno ban iaid sha khmat ha kane ka kam namar ka phang jong u dewiong ka dei ka bynta kaba ha khmat eh jong kane ka sorkar kaba mynta, la ong u myntri rangbah ka jylla ia kane ka kynhun.
Na ka liang jong ka sorkar ka hap ban peit tuh ia ka jingpynneh pynsah ia ka mariang bad ha ka juh ka por na ka liang jong ka sorkar kan ia kren bad ka sorkar pdeng lem bad kiwei kiwei ki bor kiba dei peit ia kane ka kam, la ban iang u Conrad.
