Shillong, Naitung 05: U Dr Donkupar Roy president jong ka UDP, u la ong ba kum ka party ka seng kan dang ia shong ban shim ia ka rai iano kin kyrshan ha kane ka election president kaban sa long shen ha ka Ri India.
Kum ki nongjied ia u president jong ka Ri kiba dei ki MLA, na ka liang jong ka party UDP kala leit ban sngap ia ka jingkren jong ka Meira Kumar ka kyrtong president kaba la pynieng da ka seng Congress bad la kyrnshan da ki liang pyrshah kiba don ha parliament bad kane ka jingleit jong ki mynta kam mut ba ki ai ka jingkyrshan ia ka kyrtong ka seng Congress.
Ia ki MLA baroh la khot da ka seng Congress ba kin ia poi sha kane ka jingwan jong kane ka kyrtong president bad haba ki wan ki kyrtong ki leit ban sngap kaei ki don ban ong na ka bynta kane ka election bad ha kine ki sngi u kyrtong president jong ka seng BJP ruh un sa wan ki kin leit ban ia kynduh ia u ban sngap, hynrei ban ong iano kin kyrshan iata ki dang hap ban ia rai.
Ha ka juh ka por na ka liang jong u Dr Donkupar u la pynsngew ba kan bha lada ki lah ban kyrshan ia u kyrtong u ban jop namar ka jylla ka don kam ia u president ha kiba bun ki liang, namar ki don ki bill lada ka sorkar jylla ka pass hap ban ioh ia ka jingmynjur jong u president bad kiwei kiwei ki kam, lada la don ka jingiajan kam kham suk ha ka jingiadei.
