Shillong, Nailur 30: U Myntri Rangbah ka jylla u Conrad K Sangma u la dep ban pynkhreh ban bujli ia ki myntri hapoh kane ka sorkar Meghalaya Democratic Alliance (MDA) ha u bnai Risaw jong kane ka taiew ban sa wan.
Katkum ki lad khubor kiba u SP News Agency u la ioh jingtip la ong ba ka jingbujli myntri kan long ha kane ka taiew ban sawan jong u bnai Risaw bad ka jingbujli kan long ar lane lai ngut ki myntri, wat la ia ka kyrteng ym pat lah ban ioh hynrei kan don ka jingbujli ia ki myntri.
Haba ia dei bad ka party National People Party (NPP) kaba ia lam ia kane ka sorkar MDA, u State President u Dr W.R Kharlukhi haba kren bad u SP News Agency na Delhi u la ong ba kane ka dei ka bynta jong u myntri rangbah ka jylla ha kaba ym lah ban ong ei ei.
Haba la kylli hato u la phah ne em ia ki kyrteng na ka liang jong ka NPP kumba la pynpaw da u National President u ba dei u myntri rangbah ka jylla u Conrad K Sangma na ka liang jong u Dr Kharlukhi u la ong ba u khlem phah kyrteng ei ei ruh em namar ban thung bad ban weng ka dei ka bor jong u myntri rangbah ka jylla.
Ban shu kdew ba u president jong ka UDP u bah Metbah Lyngdoh u ba dei dei ruh u shongknor jong ka iing dorbar thawain ka jylla u la dep ban kren shai ba ka UDP kaba don bun eh ki MLA ha kane ka sorkar MDA kan nym don ka jingbujli ia ki myntri kiba dei na ka party UDP.
Ka jingiatan ban long myntri ka long ha ka party HSPDP ka ba don tang ar ngut ki MLA ki ioh bhah kawei ka shuki, ka party PDF kaba don saw ngut ki MLA ki ioh bhah ar tylli ki shuki myntri bad ka BJP ka ba don ar ngut ki MLA ki ioh bha kawei ka shuki myntri.
