Shillong, Jylliew 11: Ka KSU South West Khasi Hills District ka pynrem jur iaka jingkem ki pulit ka South West Khasi Hills District haka Janmiet sngibalang ia u Samla Rutherford Lyngdoh, General Secretary KSU Mawkyrwat Circle halor ka jingpharep kulmar halor ka jingshah shoh jong u Engineer, NHIDCL haka 7 tarik ha thain Mawkyrwat.
Ka seng ka kren shai ruh ba kane ka jingkem ia u nongialam ka seng ka dei kum dieng tyllaw ban pynrhem iaka jingialeh jong ka seng ha kane ka thma Corona virus kiba ka sorkar bad ki bor District ka South West khasi Hills District ba ki khlem lah ban tehlakam da kaba teh Pyrkhing tang iaki traishnong hynrei ki pyllait laitluid pat iaki bar jylla ban rung ban mih Katba mon hapoh ka District.
Naka liang ka KSU South West Khasi Hills District ka ong, ka jingkem iaki dkhot jong ka seng ka dei ka ka jingtap eitmiaw ka sorkar. Ka dei ruh ka jingpyrshang ban pynsngapjar ia ka seng haba ka kren pyrshah iaka jingpyrshah jong ka ban wanrah bar jylla ha kaba kum kane ka por ba ka dang don ka jingjur jong u corona.
Watla katta ka seng kan iai bteng ban khanglad ia kane namar ngim kwah ba ki jingtreishitom jongki shnong ki thaw hapoh ka District lyngba ki COVID Management Committee kin shu sepei noh daka jingshah laitluid iaki briew ba nabar. Ka seng ka sngewthuh ba ki donkam iaka roi ka par hynrei ha kane ka por kam pat longshngain ban iakren iaka roi ka par da kaba wanrah bar jylla.
Ka seng ka sngewlyngngoh ba kumno ka DC ka pynkhreh daka appeal sngewkhia ban shah ban wanrah dkhar haka kyrteng development hynrei kam ju don pat ka jingiasyllok bad ki nongbylla sngi, ki nongdie madan, ki rangli ki Juki ban thawlad ban iarap iaki naki jingeh ha kum kane ka por pakhang.
Ka bor District ka khlem lah ban iada iaka District namar kumba long mynta ka pyrkhing tang iaki trasishnong hynrei sopsop ka DC ka ai jingbit iaki bar jylla watla la thikna ba kan nym don ka jaka quarantine ba biang na bynta jong ki, la kynnoh ka KSU.
Haba ki bor District kim lah ban tehlakam ha kane ka por ka seng ka la rai ban shim hi noh daki sienjam ban khanglad hi iaka jingwanrung kulmar jong ki briew nabar jylla haka kyrteng kam pynroi hynrei ka buh jingma pat ia ki traishnong kiba bud ryntih iaki jingbthah ja sorkar.
Ki bor sorkar bad DC South West Khasi Hills District ki la shet kylla iaki paitbah bad ki nongialam shnong namar ba ki leh mynleh ia treilang tang kumno ban teh pyrkhing iaki traishnong hynrei sopsop ki ai jingbit pat ban shah wan rung bar jylla hapoh ka District.
Ka Deputy Commissioner South West Khasi Hills District ka dei ban shim iaka jingkitkhlieh lada mih positive case ha South West Khasi Hills District namar dei ka Anti local policy jongka hi kaba shah iaki ban rung sopsop hapoh ka District.
Ka seng KSU kan nym Kynran dien, lah ban kem iaki dkhot ne ki nongialam hynrei ngin nym shongthait pat ban trei hi noh na bynta ka jingkoit jingkhiah ki paitbah da kaba ngin iai bteng ban shim daka lynti ban khanglad hi noh iaki bar jylla kiba wanrung hapoh ka jylla khnang ba kan nym mih kano kano ka jingeh hadien.
Ka seng kan iai bteng ban shim hi iaka jingkitkhlieh ban khanglad iaki bar jylla hapoh ka District tad haduh ba ka District Administration jongka South West Khasi Hills District bad ki bor sorkar kin pynmih da kawei pat ka rai ban Khang noh iaki bar jylla ban wan rung haka kyrteng jongki Highly skilled labourers la ong u samla Forwardman Nongrem President KSU ka SWKH District.
