Shillong, Lber 25: U Bah LG Nongsiej Chairman jong ka KHasi Hills Autonomous District Council (KHADC) u la khot ia ka dorbar ba kyrpang ban ia kren halor ka kaiphot ba ka House Committee kala dep ban ai. Ka iing dorbar kan sdang ha ka por 11 baje mynstep.
Ia kane ka jingkhot ia kane ka dorbar ba kyrpang la pyntip sha baroh ki MDC jong ka KHADC da ka shithi. Ka jingkhot ia kane ka dorbar ba kyrpang ka long tang na ka bynta kawei ka agenda bad kata ka long ban ia kren halor ka jingkynnoh ba la sei pisa bakla na ka pla pisa jong ka KHADC bad thep pat sha ka account jong ki riew shimet.
Lah ban kdew ba kala don ka jingkynnoh ba kala don ka jingsei ia ka pisa jong ka KHADC kaba dei na ka Professional Tax bad ia kane la thung ia u nongbishar ban tohkit bad ia kane ka kaiphot la wanrah hapoh ka iing dorbar bad ka iing dorbar kala thaw ia ka House Committee ban peit bniah bad mynta pat yn wanrah ia ka kaiphot hapoh ka iing dorbar ban ia kren ia kaei kaba ka House committee ka shem.
