Shillong, Iaiong 18: Ka jingialehkai kaba 83rd Senior National Table Tennis Championship 2021 kaba 8 sngi lynter kala sdang mynta ka sngi ha nongbah Shillong ha kaba ki nongwan ia shimbynta na kylleng jong ka Ri India ki don haduh 450 sngi bad kane ka jingialeh kadei ka sien kaba ar kaba la long ha Shillong.
Kane ka jingialeh kai kaba 83 kaba la long ha Shillogn ka dei kaba la pyniaid da ka Meghalaya Table Tennis Association da ka jingkyrshan ka tnad ia lehkai jong ka sorkar Meghalaya, ia kane ka jingialehkai la pynlong ha Indoor Stadium jong ka SAI ha NEHU.
Ia kane ka jingialehkai la plie da u Lamphang ka iing dorbar thaw ain jong ka jylla u bah Metbah Lyngdoh ha ka jingiadon u myntri ialehkai ka jylla u bah Banteidor Lyngdoh, u President ka MTTA u bah RG Lyngdoh bad kiwei ki nognkit kam jong ka seng.
Ha kane ka jingkren plie u Lamphang ka iing dorbar thaw ain ka jylla la ong ba ka sorkar ka dei ban phai khmat sha ki thain nongkyndong ban ai jinghikai ia ki samla, la ong ba bun ki samla kiba don sap kim ioh ia ka lat namar ka jingduna ha ka ioh ka kot.
U Lamphang ka iing dorbar ka jylla Meghalaya la ong ba ka jingialehkai Table Tennis ka dei ka jingialehkai kaba sted tam wat la ka long hapoh iing namar ha kane ka jingialehkai don kam ban pynlait jingmut bha.
Na ka liang jong u Lamphang ka iing dorbar u kit bok ia baroh kiba la wan ban ia shim bynta ha kane ka jingialehkai ba kin sngew tynnad bad haba ki lait por kin leit ban jngohkai ia ki jaka shangkai pyrthei jong ka jylla.
