Shillong, Rymphang 24: Ka seng FKJGP Diengpasoh mynta ka sngi kala pynlong ia ka jingialang paidbah ha jingkieng Umkhen ban ia mir jingmut kumno ban pynsngewthuh ia ki paidbah ban kiar na ki kam dih Drugs bad ki kam awria kiba pynphirang ia ka jingpang AIDs khamtam eh ha ki surok bah.
Haba kren ha kane ka jingialang paidbah u SP jong ka Shillong City u Bah Vivek Syiem u la kyntu jur ia ki paidbah ba ki dei ban kiar na ka jingdih ia ki drugs bad kiar na ki kam awria namar kine ki wanrah ia ka jingsaphirang jong ka jingpang AIDs khamtam ha ki surok bah bad kane ka jingiabit ka long khamtam eh na ki nongniah trok.
Na ka liang jong u Bah Ian Swer Dy. Superintendent of Police(Re) ha ka jingkren ka jong u la kren halor ka phang kumno ban long kiba phir ha kaba niah kali ha ki surok bad kane ka long khamtam eh ia ki drabar trok kiba hap ban iaid bad miet bad sngi. Ka kong J Tariang jong ka MACS kala kren ba kumno kane ka jingpang ka saphriang bad kiei ki lad ki lynti ban iada.
Ha kane ka sngi la pynlong ruh ia ka jingtesh ia kumba 200 ngut ki draibar trok da ki briew jong ka MACS,ia kane ka jingialang paidbah la pynlong da ka jingiatreilang bad ka dorbar shnong Dingphasoh, ka MACS ryngkat bad ka seng FKJGP jong katei ka shnong, ki nongshong dukan baroh ha shilynter jong kane ka surok bah kila wan ban ia shim bynta lang.
Kiwei kiba la kren ha kane ka jingialang ki long u Bah Kynsai War, President FKJGP Mawrynghang Circle, Sordar Diengpasoh u Bah Gordon Wahlang, President Seng Kynthei Diengpasoh ka kong Sana bad but sa u Bah Kitbok Nonghlang, nongkit kam ka central body jong ka seng FKJGP.
