New Delhi, Lber 28: U myntri khynnah ba dei peit ia ka tand kam poh iing jong ka sorkar pdeng u Hansraj Gangaram Ahir, haba jubab ia ka jingkylli jong u Dr. Kambhampati Haribabu, da ka jingthoh hapoh Lok Sabha mynta ka sngi la ong ba la bethah ia baroh ki sorkar jylla bad ia ki Union Territory ba dei ban pynbun ia ki pulit kynthei haduh 33 percent na ka jingdon jong ki pulit. Ka jingdon jong ki pulit kynthei ha ka Ri India baroh kawei ka long tang 7.10%.
Kumba ka long ka kam ban peit ia ki pulit ka dei ka kam jong ki sorkar jylla namar ka hap hapoh ka List-II jong ka schedule kaba hynniew hapoh ka riti synshar jong ka Ri India, ha ka jingshisha ka dei ka kam jong ka sorkar jylla, hynrei ka sorkar pdeng kala bethah ia ki sorkar jylla ha ka 04.09.2009 bad 22.4.2013 ba ki dei ban kyntiew ia ki pulit kynthei sha ka 33percent na ka jingdon jong ki pulit ha ka jylla.
La bethah ia baroh ki sorkar jylla ba kin pynmih ia ki kam na ka bynta ki pulit kynthei ha ki kyrdan langrut bad ha ka kyrdan Sub-Inspector, da kaba pynkylla noh ia ki kam kiba lait sha bha jong ki kynthei. La ong ba kawei kawei ka police station ka dei ban don 3 ngut ki SI pulit kynthei bad 10 ngut ki pulit langrud.
Ka Ministry of Women and Child Development (WCD) da ka jingiatreilang bad ka tnad kam poh iing kala don ka jingiakren ban wan thaw ia ka kynhun pulit ba la tip kum ka “ Mahila Police Volunteers” ha ki jylla bad Union Territory bad kane ka kynhun ka rukom trei kam kan long ha ki pulit bad ki shong ki thaw.
La bethah ia baroh ki Chief Secretary jong ki jylla ba kin pynkhreh noh ia kane ka phang bad ka kam jong kane ka MPV ka long ban pynshlur ia ki kynthei ba kin wan sha khmat ban ai ia ki jingujor jong ki lada ka don kano kano ka jingshah ban bein jong ki bad lada don kam ban iarap ki pulit kin hap ban wan sha khmat. Kino kino ki kynthei kiba la don ka jingmang jingtip kiba la 21 snem sha nenng kiba la pass ia ka Class 12 ki lah ban shah jied ha kane ka MPV.
Kumba ka long mynta ka jylla Haryana, kala long ka jylla kaba nyngong eh ban pynrei kam ia kane ka Mahila Police Volunteer scheme, da kaba sdang ia ka ha u snem 2016 ha ki ar tylli ki District Karnal bad Mahendragarh. Ka jylla Andhra Pradesh ruh kala ioh ia ka sanction ban sdang ia kane ka kynhun MPV na ka bynta ka District Anantapur bad Kadapa bad ia ka pisa la bei na ka Nirbhaya Fund.
