Shillong, Naitung 23: Ka VDP Nongjrong ka la pynlong da ka jingialang kaba kyrpang ha kaba u Bah Banteidor Lyngdoh, MDC Mawkynrew Constituency u la long kum u Kongsan. Ha katei ka sngi la iadonlang ruh ki Officer na Madanrting PS, Shillong.
Ha ka jingkren u SI ER Marak u la ban jur ba ki VDP kim dei tang ban peit ia ki kam sniew hapoh shnong poh thaw hynrei ruh ban ai ka jingshakri ia ki sawdong sawkun bad ban iada ia ka mariang naduh ki khlaw bad ki mrad ki mreng. Ki kam kiba rit baria bad kiba dang lah ban pynbeit dei ban tian bishar ha ka bor ki VDP.
La ong ba lada ym lah kin phah sha ki bor shnong bad lada shem jingeh nalor nangta yn ai report pat sha ki bor ka ain. Ha kaba iadei pat bad ki kam thombor ia ki kynthei khynnnah, na ka liang u SI u la ong ba ka shnong kam don hok hynrei dei ban aiti beit sha ki bor ka Ain.
Haba kren kum u kongsan ha katei ka sngi na ka liang jong u Bah Banteidor Lyngdoh, MDC Mawkynrew Constituency u la ai ka jingiaroh shikatdei eh ia ki Dkhot VDP Nongjrong kiba la shim ia ka jingkitkhlieh ban tynrong lem ia ka khia ka shon jong ka shnong bad na ka liang jong u kum ka dak jong ka jingiasnohkti lang u la noh jingiarap da ki Uniform ha katei ka sngi khnang ba yn lah ban ithuh ha ka por ba ki treikam.
La pyniaid ia ka jingialang da u Bah Pynshaiborlang Synjri, Sordar Shnong bad la ioh jingkren na U Bah Kolin Rangtong, Sordar barim Nongjrong, Bah Kamai Nongrum, President VDP, Bah Smon Lyngdoh, President barim VDP ha ka jingiadon lang ki riew rangbah ka shnong, Bah Roben Synjri, Secretary VDP bad Bah Shek Mukhim Secretary Shnong Nongjrong.
Ha katei ka juh hi ka sngi na ka liang jong u Bah Banteidor Lyngdoh, MDC Mawkynrew Constituency u la noh synniang ruh da ki kor Computer sha ka Church of God, LP/UP/Secondary School, Nongjrong, ha ka jingialang kaba iphuh iphieng bad kaba i shongkun namar la sakhi da ka jing ia don ryngkat ym tang na ka liang jong ki Nonghikai bad Khynnah Skul hynrei la ia don ryngkat ruh naduh ki Nongialam Shnong ki Khun samla jong ka thain bad khamtam eh ki Kmie ki Kpa jong ki khynnah skul ha ryngkat ki dur khmat kiba phuh samrkhie da ka jingkmen.
Haba kren ha ka jingialang ha katei ka sngi u Bah Banteidor Lyngdoh u la ong ba kum ka pateng bynriew ngi la jam pat sha ka spah snem jong ka Science & Technology kumta kum u Nongmihkhmat ha i bor iba rit tang u shim ia kane ka sienjam da ka jingkyrmen bad jingkhmih lynti ban kyntiew ia ka pule ka dangle ha ka Thain bad ha ka Constituency hi baroh kawei katkum ka jing iaid jong ka por khnang ba ki skul kin ioh ban ai ia ka jing nang jing stad kaba paka tam katkum ki jingkylla jong ka por.
Ki Rangbah kiba ia donlang ha katei ka sngi ki kynthup ia u Bah Bror Nongspung President SMC, Bah Pynshaiborlang Synjri, Secretary SMC, Bah Fourstar Kharbuli, Headmaster UP, Miss Lumlang Rangtong, Headmaster LP ha ryngkat ki kmie ki kpa bad ki khynnah skul. La pyniaid ia ka jingialang da i Bah Fourstar Kharbuli.
