Shillong, Jylliew 13: Ka KSU mynta ka sngi kala leit ban ia kynduh ia u myntri ka tnad rep u bah Bantreidor Lyngdoh ha kaba ia dei bad ka “Central Agricultural University” kaba dei ban don ha kyrdem kulai ia kaba kim sngewthuh shuh mynta kala poi sha na.
Haba kren ha ki lad pathai khubor ha dien ka jingiakren bad u myntri ka tnad rep, u samla Donal V Thabah General Secretary jong ka seng ba ialam ia ka kynhun u la ong ba ha ka jingiakren na ka liang jong ka seng kala kren shai ba ki kwah ia ka “University” um ia ka College.
Ha u snem 2010 la kren shai da u myntri ka sorkar pdeng ba ka dei ban long ka University, hynrei kaba phylla mynta kala kylla long tang ka College ia kaba kin nym lah ban pdiang, ka jaka kaba la thied ka long 200 akar ban buh ia ka Univeirstiy.
Ha kane ka jingiakren na ka liang jong u myntri u la kular ia ki nongialam ka KSU ba na ka liang jong u myntri rangbah ka jylla bad u kum u myntri ka tnad rep kin sa leit sha Delhi na ka bynta kane ka kam ban ia kren shai bad ka sorkar pdeng.
Na ka liang jong ka seng kan ap ia kane ka jingleit ia kynduh jong ka sorkar bad kin peit kaei ka jubab ha kaba ia dei bad kane, na ka liang jong ka seng kan nym shong kli kti ban shu pynkylla ia kane ka “Central Agricultural Unviersity sha ka College, ka seng ka kwah ia u Vice Chancellor ban don ha kane ka jaka ym da kiwei.
