Shillong, Lber 12: U Dr Donkupar Roy Speaker jong ka iing dorbar thawain ka jylla u ba la shah jied mynta ka sngi, u la kular hapoh ka iing dorbar ba baroh ki dkhot jong ka iing dorbar kin ioh ia ka jingiada katkum ki kyndon jong ka ain bad u la ong ruh bay n ieng katkum ka riti synshar jong ka Ri India.
Naka liang jong u speaker u la ong ba bun sien la pyndon kam ia ka shuki jong u speaker na ka bynta ban pynkhyllem ia ka sorkar, hynrei na ka liang jong u Dr Donkupar u la ai ka jingkular bay n long u ban nym ia shah liang ha kaba pyniaid ia ka iing dorbar. Na ka liang jong u Spekaer u la pynpynmaw ia u snem 1990 ha kaba la pyndon kam ia ka shuki jong u speaker ban pynkhyllem ia ka sorkar.
Na ka liang jong u Speaker ba thymmai jong ka iing dorbar u la ai ka jingkular ban don ka jingai jinghikai ia ki MLA kiba thymmai kumba kila pynpaw ha ka por ba ki ia shimbynta ka jingkren ai khublei. Ha ka juh ka por da ka jingiatreilang jong baroh ki MLA kyrmen ba ia ka iing doprbar thawain jong ka jylla lah ban tei.
Ha ka jingkren ai khublei na ka liang jong u myntri rangbah ka jylla u Conrad K Sangma u la pynpaw ia ka jingsngew kmen ban ioh ia u Dr Donkupar kum u Speaker jong ka iing dorbar namar u la jop ia ki election la hynniew sien lynter bad hapoh ka jingalam ka jong u lah ban pyniaid ia ka iing dorkbar ha ka rukom kaba biang khlem da don lang synshar ne liang pyrshah.
Haba ia dei bad kiba bun ki MLA ki dang shu jop thymmai na ka liang jongu myntri rangbah u la kyntu ba kan bha lada ka don ka jingai jinghikai kyrpang ia ki ban sngewthuh ia ka rukom pyniaid ia ka iing dorbar badba kumno kin lah ban ia shim bynta.
Ha ka jingkren na ka liang jong u nongialam ka liang pyrshah u Dr Mukul Sangma u la ong ba kia long kaba don bok ban ioh ia u speaker jong ka iing dorbar u la don bun ki jingtip ha kaba ia dei bad ki kam jong ka iing dorkar, namar u Dr Donkupar u la long u nongialam ka liang pyrshah, u la long u Deputy Chief Minister, Chief Minister, Chairman ka state planning board bad kiwei kiwei ki kam ha ka sorkar bad u don ka jingngeit skhem bay n ialam ia ka iing dorkar ha ka rukom kaba biang.
Kiwei ki dkhot jong ka iing dorbar kiba la ia shimbynta ha kane ka jingkren ai khublei ki long u Martin M Danggo, Bah Prestone Tynsong, Lakmen Rymbui, Dr M Ampareen Lyngdoh, bah PT Sawkmie, Bah Lambor Malniang, bah George B Lyngdoh, bah AL Hek, Zenith M Sangma, Renikton Lyngdoh Khongkhar, Tinmorthy Shira, Metbah Lyngdoh, Winnerson D Sangma, bah Banteidor Lyngdoh, bah Charles Pyngrope, Thomas A Sangma, Meralborn Syiem, Hamlet Dohling, James K Sangma, Bah SK Sunn, Saleng Sangma, bah Dasakhiat Lamre, bah S Sohtun, bah Jeson S Mawlong, ka Agatha Sangma.
