Shillong, Iaiong 15: Kut noh ka Swachhta Pakhwada ha NEIGRIHMS, Rah ka Martin Luther Christian University ia ka nam lah duh ha ka jingialehkai skit; Ka Swachhta Pakhwada, kaba la sdang ha ka 1 tarik u Iaiong 2019 da ka jingplie paidbah ha ka OPD jong ka NEIGRIHMS, ka la kut noh mynta ka sngi ka 15 tarik u Iaiong 2019 da ka jingsam ia ki khusnam sha ki nongjop kiba la ia shim bynta ha ki jingiakop bapher bapher ha kane ka Pakhwada.
Ia kane ka Programme kaba khatsan sngi la plie paidbah da u Director ka NEIGRIHMS ha ka 1 tarik u Iaiong uba la ialam ia ka jingbam smai ia ka Swachhta ia baroh ki nongiashimbynta bad u la ban ba ka jinglehkhuid ia ki rud ki kiar ka dei ka jingkitkhlieh jong uwei pa uwei u briew. Ia ka jingthung ia ki 100 tylli ki tynrai dieng la leh ha kajuh ka sngi ha ryngkat ka jingiatrei lang ka Mission Green Committee bad ka State Government Programme Implementation and Monitoring Committee, ka sorkar Meghalaya.
Ha ka 2 tarik u Iaiong, ia ka jingpynitynnad ia ka phyllaw bad ka jingpynkhuid ia ki tiar ki tar bad ki kot ki sla ki bym donkam shuh la leh da ki tnad bapher bapher jong ka NEIGRIHMS. Naduh ka 2 haduh 15 tarik u Iaiong 2019, ia ka jingai jinghikai halor ka koit ka khiah la ai sha ki nongpang bad ki nongap nongpang da ki nongtrei jong ka NEIGRIHMS ha ki kynta ba dang plie ka OPD.
Ia ka jingkren halor ka jinglehkhuid ha ka jinglong kynthei bad ka jingbreh ia ki sanitary napkin la pynlong ha Lady Keane College, Loreto Convent bad Seng Khasi Higher Secondary School da ki riewstad ka koit ka khiah na NEIGRIHMS ha kane ka Swachhta Pakhwada
Ha ka 5 tarik u Iaiong, ia ka Swachhta Conference, “Hygeia 2019” la pynlong ha NEIGRIHMS Auditorium ha kaba ki nongtrei ba peit ia ka khuid ka suba jong ki jaka pule bapher bapher ki la ia shim bynta da kaba shongshit bha. Ka jingiakop ialehkai skit bad ka jingiakop thoh esse la pynlong ruh ha kane ka por.
Ha ka 8 tarik u Iaiong, ia ka jingiapynkhuid la shimti da ki khynnah pule bad ki nongtrei ka NEIGRIHMS ha ryngkat bad ki nongshong shnong ka Pynthorumkhrah. Ia kane ka jingiapynkhuid la pynlong ban wanrah ia ka jingtip bad ka jingsngewthuh ha ka shnong ka thaw shaphang ka jinglehkhuid lehsuba. Ia kane ka jingiapynkhuid la ialam khmat da u Medical Superintendent ka NEIGRIHMS ha ryngkat ka Dorbar Shnong.
Ha ka sngi pynkut ia ka Swachhta Pakhwada, u Medical Superintendent ka NEIGRIHMS ha ka jingai khublei ia baroh ki nongiashimbynta, u la pynpaw ia ka jinghun jong u halor ka jingjop ban ai ia ka khubor ba donkam halor ka jingkhuid jingsuba sha ka imlang sahlang lyngba ka conference, ki jingiakren, ka jingialehkai skit, ka jingiakop dro dur poster bad kumta ter ter. Ia ki khusnam bad ki syrnod la sam sha ki nongjop ha kane ka jingialang.
Ia ka nam lahduh ha ka jingialehkai skit la ioh da ki khynnah pule jong ka Social Work Department, Martin Luther Christian University. Ha ka kynhun jong ki hospital, ia ka nam lahduh la ioh da ka tnad Sanitation jong ka NEIGRIHMS. Ha ka jingiakop dro dur poster, ia ka nam lahduh la ioh da ka Barbie Kalita na Lady Keane College bad u Robinstar Ryntathiang. Ha ka jingiakop thoh esse, ia ka nam lahduh la ioh da ka Ophelia Mary Kharmujai and ka Melakerbha Rumsong.
