Kynnoh ka Cong ba thied ka sorkar u Modi ia ki 36 tylli ki liengsuin ia pom khlem khot tender

Shillong CityShillong, Nailur 14:  Ka Shillong City Congress Committee mynta ka sngi kala phah ia ka dorkhas sha u president jong ka Ri India u Ram Nath Kovind lyngba u Deputy Commissioner jong ka East Khasi Hills District.

Ha kane ka dorkhas na ka liang jong ka seng Congress kala kynnoh ba ka sorkar NDA hapoh ka jingialam jong u Myntri rangbah duh u Narendra Modi kala iehnoh khlem da khot ia ka tender ban thied ia ki 126 tylli ki lieng suin ia pom kiba la tip kumki Rafle bad kala thied 36 tylli ki liengsuin ia pom khlem da khot tender. Kane ka sorkar jong u Modi kam shym la batai ia ki jingshisha sha u paidbah.

Ha kane ka dorkhas ka seng Congress kala kdew ba ha ka por ba ka Congress kala ialam ia ka sorkar ha u snem 2012 kala thep tender ban thied ia kine ki lieng suin ia pom ha ka dor T.18.940/- klur kawei ka lieng suin bad na ka bynta 36 tylli kanpoi sha ka T.526.10 klur.

Ka Congress kala kynnoh ba kane ka sorkar u Modi khlem da khot tender kala thied ia kane ka juh ka lieng suin Rafale  ha ka dor T.60.145 klur kawei bad naka bynta 36 tylli kala kot sha ka T.1670.70 klur ia kane la siew ha u bnai Iaiong 2015.

Ka seng Congress ka kylli hato ka sorkar pdeng kan batai sha u paidbah ia ka pisa kaba la siew tam T. 41.25 klur kaba dei ka pisa jongu paidbah. Ka jingiasoi ha kaba thied ia ki Rafale ka long kaba la ia soi sob sob la kynnoh ka seng Congress bad u myntri rangbah duh u khlem shim ia ka jingmynjur jong ka kabinet la leh hi marwei.

Haba ia dei bad kane ka jingthied ia kine ki liengsuin ia pom ka seng Congress ka dawa ba dei ban ai sha ka Joint Parliamentary Committee ban tohkit ha kaba ia dei bad kane ka jingthied ia ki Rafale kala wan rah ia ka jingduh ia ka ri da T.41,000 klur. Ka seng Congress ka sngew ba ia u myntri rangbah duh jong ka Ri dei ban khot hajir ha khmat jong ka JPC.

Ha kaneka dorkhas kaba la phah mynta ka sngi sha u president jong ka Ri lyngba u Deputy Commissioner jong ka East Khasi Hills ka party Congress ka kyntu ia u president ba u dei ban wan hapdeng ban kren ei ei ha kaba ia dei bad kane ka jingleh kane ka sorkar jong u Modi. Ia kane ka dorkhas la soi da u bah Charles Pyngrope president  jong ka Shillong City Congress Committee.

What Next?

Recent Articles

Leave a Reply

Submit Comment

*