Shillong,Nailar 14: Ka Synjuk ki Nongialam ka Ri Bhoi District (SNRBD) ki la pynpaw ia ka jingsngew pyrshah jur ia ka jingrakhe silver jubilee jong ka Ri Bhoi District kaba leh shilliang khmat ia ki lai tylli ki dong jong ka ri Ri Bhoi kiba khlem shah khot sngewbha ha kane ka jingrakhe.
Ki lai tylli kiba don kiba khlem shah khot sha ka committee ban rakhe ia ka Silver jubilee ki long ka Ri Bhoi Mihngi kaba kynthup ia ka Umroi Konstitwensi, Ri Bhoi Sepngi kaba kynthup ia ka Jirang bad Ri Bhoi shatei kaba kynthup ia ka Mawhati konstwensi bad ka jingrakhe ia ka silver jubilee ka la long beit thik tang ia ka Umsning bad Nongpoh.
U Bah Sunlight Shadap u Chairman ka SNRBD haba ai jingkren sha ki lad pathai khubor ula ong, “Ngi sngew ba ka jingleh shilliang khmat da kaba kyntait sharud ia ki lai tylli ki dong jong ka Ri Bhoi ka long kum ka jingibein ia ki paidbah jong ka thain wat lada ki dei ki bynta jong ka Ri Bhoi kaba ktah bha ia ka jingsngew ki paidbah.
Ula ong,ka jingpynmih ia ka souvenir ruh ki don bun ki jingduna kaba la nang pynshisha ia ka jingleh shilliang khmat ka committee kaba pyniaid ia ka jubilee kumjuh ruh ka jingdon bynta ha ka editorial board khlem da kynthup lang ia ki trai shnong jong ki lai tylli ki dong kiba la kot kyrdan ban don ha katei ka board hynrei la mih ka kyrteng da ki bar shnong.
U Bah Shadap ula pynpaw ka jingpynmih ia ka souvenir kaba bun hi la thoh da ka ktien nongwei namar kiba bun na ki paidbah jong ka thain ki dei ki bym nang bym stad ki bym sngew thuh ia ka ktien nongwei hynrei ki don tang katto katne ki ktien ba la thoh ha ka ktien khasi.
Ka SNRBD ha kane ka taiew kan sa leit ban buh da ka jingthoh sha ka District Administration halor ka jingkyntait sharud ia ki lai tylli ki dong jong ka Ri Bhoi sha ka jingrakhe ia ka silver jubilee.
