Shillong, Jylliew 08: Hadien ba ki dkhot ka jong ka FKJGP Umsning Circle ha ryngkat ka jing ia don lang ki dkhot jong ka KSU Umsning Circle dang shen ki la ioh ban bat ïa ki bar jylla Muslim na kawei ka kali Traveller Force kaba don ia u registered number UP11 AT 8425 na kawei ka Petrol Pump kaba don ha Umran Dairy ha ka por kumba 11:30 PM.
Ki dkhot jong ka seng kila pynlong ka jingtohkit ia kitei ki mynder namar la lap ba kitei ki mynder kila pynieng iaka kali harud jong ka petrol pump bad don ruh katto katne ngut napdeng kitei ki mynder kiba la siang thiah ha madan jong katei ka petrol pump katba kiwei pat ki pyrshang bad thiah hapoh jong katei ka kali.
Ki Dkhot jong ka seng kiba peitngor ban iada na ka jingpur sted jong ka Khlam COVID-19 kaba la saphriang ha kylleng satlak jong ka pyrthei kaba pyntieng pyn smiej ruh ia ki paidbah nong shong shnong jong ka jylla hi baroh kawei khamtam eh namar ka jingkiew jong ki briew kiba ioh ia utei u khniang jingpang ha ka jylla Assam kaba don marsyndah bad ka jylla Meghalaya.
Ki dkhot jong ka seng kila leh iala ka jong ka kamram ban kylli pyrthew ia kitei ki mynder namar kadei ruh haki kynta kaba na ka liang jong ka sorkar jylla kala pynjari da ka Curfew namar la lap pyllein pyllein ba kitei ki mynder kila pynkhein ia ki kyndon ain katkum ka jingbthah jong ka sorkar ba kadei ban don ka Social Distancing, ban deng ia ki Mask bad kumta ter ter.
Hadien ba ki dkhot jong ka seng kila dep ban pynlong ia ka jingtohkit kila pyntip ruh sha ki bor jong ka Ain kata da kaba phone sha Umsning Police Outpost da kaba khmih lynti ba ki bor jong ka ain kin leh ia kaba donkam, phewse ka long pynban da khongpong namar hadien ba ki Pulit kila wan poi ha katei ka jaka kila shu phah pynban ia kitei ki mynder ban iaid beit noh khlem kano kano ka jingteh kyndon.
Kaba pynlyngngoh bad pyn bitar shuh ia ka seng pat ka long ba tang hadien ar bad lai sngi jong katei ka jingjia ki Pulit jong ka Umsning Outpost lyngba u Investigating Officer (IO) kila phah pynban da ka Notice ban khot hajir ia u Samla Gabrial Sunn, General Secretary FKJGP Umsning Circle ban tohkit halor jong katei ka jingleit bat ia kitei ki bar jylla.
Halor kane ka jingshah khot hajir utei u nongïalam ka FKJGP na Umsning Circle, na ka liang jong ka FKJGP, North Khasi Hills District Unit, ka pynrem jur ia katei ka jingleh jong ki pulit kiba kynnoh pynban ia u dkhot ka FKJGP ba u la pynkhein ïa kata ka Night Curfew.
Ka FKJGP ka pynpaw ia ka jingsngew lyngngoh pat ba ia kitei ki bar jylla kiba don haduh 16 ngut watla ki la pynkhein ain khlem da don kano kano ka jingiada na ka jingpur ka khlam Corona virus ka tnad Pulit kam shym la leh ei ei bad la shu pynlait suk ba kin leit phai sha Silchar.
Ka FKJGP, North Khasi Hills District Unit, ka buh ka jingkylli ia ka Police Department bad kumjuh ruh ia ka sorkar jylla: “Hato kata ka jingpyrkhing lyngba ki kyndon ain kiba pher bapher ban iada iaka khlam COVID-19 bad kumjuh ruh kata ka Curfew kan treikam tang ia ki trai ri trai muluk”.
Ka FKJGP, North Khasi Hills District Unit ka pynrem jur ia ka jingpyrshang ban tap eit miaw jong ka Police Department bad ha kajuh ka por ka pynrem jur ia ka jing kynthoh khlem nongrim jong u Bah Prestone Tynsong, Dy.C.M uba la shu kren lap lah khlem da tip ia ka dang ka wai da kaba kynnnoh ba ki Seng bhalang ki pyrshang ban ialam bakla.
Haba ia dei bad ka jingjia ha Umsning ka FKJGP ka kam ba ka seng ka don lut ia ki sakhi satar lyngba ki jingring dur ba ka jingioh bat ia ki mynder kiba pynkhein ain, Lada u Bah Prestone Tynsong u ong ba katei ka kali ba la shong da ki bar jylla ka dang theh Petrol, ka seng ka buh ka jingkylli ba naduh mynno ka sorkar kala shah ia katei ka Petrol Pump kaba don ha Umran dairy ban plie ha ka por 11:30 Pm kata ruh ha ka por ba ka sorkar jylla kala pynjari ia ka Curfew.
ka Seng lyngba kane ka kyrwoh ka pynpaw da kaba shaikdar sha kita kiba pyrshang ban iada iaki mynder ba ka FKJGP kan dang iai bteng ban teh lakam ia ka jingwanrung kyrthep jong kibriew kiba nabar bad kum ka seng kan ym riej lyngba kita ki jing pyntieng koh tympan.
Ka Seng baroh shi katta ka ju iatrei lang ryngkat ryngkat bad ki bor sorkar bad bor pulit khamtam ha kaba kum kane ka por ba baroh ki paidbah ki sngew khuslai jingmut ia kata ka khlam COVID-19 hynrei hadien katei ka jingjia shah khot hajir jong ki dkhot ka seng nangne shakhmat ka seng hi kan iaid la ka jong ka lynti ban iada iala ka jong ka jaitbynriew lyngba ki lad ki bapher bapher.
Ha kajuh ka por ka FKJGP, North Khasi Hills District Unit ka kyntu ia baroh ki Circles bad ki Units kiba pher bapher kiba hap hapoh u pud u sam jong ka North Khasi Hills ba kin long kiba peitngor halor ka jingrung laitlan jong ki briew kiba nabar bad ha kajuh ka por ban nang trei shit rhem shuh shuh nangne shakhmat. Kane ka long katkum ka kyrwoh kaba la phah da u Bah Luistar General Secretary, FKJGP North Khasi Hills District.
