Shillong, Naiwieng 01: Ka Seng Kyntoilang Self Help Group, kawei na ki kynhun kaba treilang na ka bynta ka bha ka miat jong ka imlang haka shnong Nongtalang, kala pynlong ïa ka jingïalang paidbah ban hikai ïa ka jingdonkam ban ïada bad pynneh pynsah ïa ka mariang haka ïing paidbah haka shnong Nongtalang haka 31 tarik u Risaw, 2018. Ïa kane ka prokram la lah ban pynlong da ka jingkyrshan pisa ka tnat Districk Planning Office West Jaintia hills District, Jowai.
Ha jingïalang kaba la wan ïashim bynta da baroh ki skul kiba don hapoh ka shnong Nongtalang; la ïoh ïa ka jingkren nyngkong na u K.L. Giri uba long u Headmaster ka Nongtalang Government Secondary School, Nongtalang. Haka jingkren jong u kum u kongsan; u ma Giri uba long uba long ruh u nonghikai saïan ula pynshai shaphang kiba bun syrtap ki jingmut kiba ïa dei bad ka ktien ‘Environment.’
Ula ong ba ka ktien Environment haka ktien phareng ka dei ka ktien kaba ïar bad kaba jylliew. Ula ong ba kaba suk eh ban sngewthuh ïa ka jingkongsan jong ka mariang bad kaba kersawdong sawkun jong ngi; ka dei ba ngin sngewthuh ba ka mariang ka kyrshan ïa ki jingdonkam jong ngi ki briew baroh. Kum ka nuksa ki jingthung ki pynmih ïala ki jong ki jingbam bad ki mrad ba ki briew pat ki bam ïa ki jingthung.
Ha kane ka sngi la ïoh ruh ïa ka jingkren na u H.H.Mohrmen uba la kren halor ka jingma kiba ap ïa u khun bynriew bad ïa ka pyrthei hi baroh kawei naka jingpynjot jong ngi ïa ka mariang bad kaba kersawdong sawkun jong ngi. Kham hashwa ïa kane la ïoh ïa ka jingkren na u Phyrnai Lyngdoh uba long u Secretary jong kane ka kynhun uba la batai ruh ïa ka jingïaid lynti jong kane ka SHG kaba dap artad shiphew nem mynta.
Mynta kane ka skul kala pynïaid shibun ki kam kynthup ïa kaba airam kylliang paradkhot (internal lending) bad ban pynïaid ïa kawei ka skul ha kane ka shnong.
Kiwei pat kiba la kren ha kane jingïalang ban pynshai paidbah (Awareness) ki dei u H.B. Rymbui uba long u Waheh Chnong ka Dorbar Shnong Nongtalang Mission bad ïa ka jingïalang la pynïaid da u H.F. Rymbui uba long u nongaibuid jong ka Kyntoilang SHG, Nongtalang Mission.
