New Delhi, Iaiong 11: U Myntri ka tnad Kam Pohiing ka Sorkar Pdeng, u Amit Shah u la khmih ia ka jingpynkhreh ban pahara ia ki jaka khappud hapdeng ka India bad Pakistan bad kumjuh ia ki jaka khappud bad ka Bangladesh, ha ryngkat bad ki BSF Command bad Sector Headquarters lyngba ka video conferencing kaba la longhynnin ka sngi.
U Myntri kam poh iing ka sorkar pdeng u Shah u la bthah ban pynkhlain ia ka jingpahara ha ki jaka khappud khamtam ha ki jaka bym pat ker sainar shiah, ban pyntikna ban nym don ba ioh rung beain lyngba ki jaka khappud.
U Myntri ka tnad Kam Pohiing ka Sorkar Pdeng u la bthah ruh ba dei ban pynsngewthuh ia ki nongrep ha ki jaka khappud halor ka khlam jingpang COVID-19 bad kaei kaba ki donkam ban leh na ka bynta ban iada ia ka jingsaphriang kane ka jingpang ha ki jaka khappud.
Ha ka jingiatreilang bad ki bor pyniaid distrik, ka BSF ka dei ban pyntikna ba ki paidbah kim dei ban iaid shabar ki jaka khappud ba la ker sainar shiah khlem kano kano ka daw.
La iaroh ia ka kam ba bha kaba trei da ka BSF wat hadien ka jingsaphriang ka jingpang khlam COVID-19. Ka BSF ha kane ka ‘lockdown’ ka la pylleit jingmut ban pynsaphriang halor ki jingtip kiba iadei shaphang ka jingpang COVID-19 katkum ki kyndon ba la pynmih da ka tnad Health and Family Welfare ka Sorkar Pdeng.
Ki BSF ka la pyrshang ruh ban synreit dawai ha ki shnong ki thaw ha ki jaka khappud, ban sam ia ki mask bad ki sabon ban sait kti, ban pynbiang ia ki mar bam bad ka um bam bad kumjub ban pynbiang ia ki dawai dashin ia ki briew kiba donkam.
Ka jingiarap kynthup sha ki shnong kiba kyndon, ki nongtrei bylla, ki briew kiba bylla sngi bad kumjuh ia ki nongniah trok kiba sahkut ha ki jaka khappud. Kiwei kiba la iadon lang ha kane ka jingialang ki kynthup ia u Myntri Khynnah ka tnad Kam Pohiing, u G. Kishan Reddy bad u Union Home Secretary, u Nityanand Rai ha ryngkat u Secretary (Border Management) bad DG, BSF.
