kyrpad ka AJYWO ia u DC ban pynkup burom u Ferdinand khlur ia kura na Jaintia Hills

Jowai, Naiwing, 29: Ka AJYWO Central Body, mynhynnin ka sngi hapoh ka jingialam jong u bah M.H Dkhar, President  bad Reachingson Siangshai, Vice President jong ka seng,   ka la ia kynduh ia u Deputy Commissioner jong ka West Jaintia Hills halor u Khlur Martial Arts  ha ka pyrthei, u ba na ka Ri Lum Jaintia, u Samla Ferdinand Suchiang u ba la ioh khur haduh 4 sien kynthih  ia ka Takma Ksiar ha ka lympung jingiakop-ialehkai Martial Arts (Jeed Kune-Do) jong ka pyrthei.

Ha ka jingiakynduh jong ka AJYWO ia u DC ka WJHD, ka seng ka la aiti ruh ia ka dorkhast kaba don haduh 29 pages kaba  iadei bad ka ka jingim, ki kam bad ka jingioh khur Takma Ksiar jong  Ferdinand Suchiang ha ka jingiakop jong ka jingialeh kai Martial Arts (Jeet Kune-Do) jong ka  pyrthei kiba u la leit ia shim bynta ha ki snem 2017 bad 2018 ha ki bynta bapher bap her jong ka pyrthei.

Ha ka jingiakren bad u DC, ka seng ka la ong ba kum ka daw jong ka jingsngew sarong jong ka Jaidbynriew ia u tei u Khlur Martial ka pyrthei u ba na Ri Jaintia, bad ruh kum ka dak ka jingithuh, jingpynshlur bad jingai-mynsiem ia u ba un nang iaid sha khmat bad trei shitom ha katei ka sap ka phong u don, bad ruh kum ka jingpynshlur ia kiwei pat ki khun samla jong ka Ri Jaintia,  ka la kyrpad ia u DC ban leh ei ei  na ka bynta u Ferdinand Suchiang, ha kaba u DC ruh u la ong ha khmat ki nongialam jong ka seng ba un sa leh ei ei  na ka bynta jong u.

“Ka jingioh khur ba shen jong u Ferdinand Suchiang haduh 4 sien kynthih ia ka Takma Ksiar  ha ka lympung jingiakop jong ka jingialehkai Martial Asts (Jeet Kune-Do) jong ka pyrthei ka long ka jingsngew sarong haduh katta  ia ka Ri Jaintia, ka Bri u Hynñiew Trep bad ruh ia ka jylla bad ka Ri India hi baroh kawei”, ong u Bah M H Dkhar, President jong ka AJYWO Central Body.

Kum ban shu kdew khyndiat, ka jimgioh jong u Ferdinand Suchiang, u ba wan na ka long iing long sem kaba duk, ban leit ia shim bynta ha ka lympung ialehkai Martial Arts  jong ka pyrthei kam dei ka kam kaba ba suk, namar ba u hap trei shitom ban iaid lyngba bun ki kyrdan (level) ba pher ba pher naduh ka State level, Regional Level, National Level bad hadien nangta sa sha ka International level.

Nalor kitei ki  4 tyllli Takma Ksiar kiba u Ferdinand Suchiang u la ioh khur dang shen ha ka Martial jingialeh kai Martial Arts (Jeed Kune-Do),  jong ka pyrthei, u la don ruh sa kiwei pat ki  kyrdan kiba u la bat kat kum ka jingtbit jong u, kum ka (1) “Diploma Certificate of Qualification as the Coach of WAKO India and Licensed as Grade-A Coach”; (2) “Certificate  for attending the Coaching Course for Wushu Coaches 2018”; (3) “Certificate for Completion the Course of International Referee and Judge Seminar set to the Highest Standard” bad ka (3) “Certificate for Completion of the International Seminar in Traditional Boran & Muay Thai Advanced Training Camp set to the Highest Standard”.

Kum ban shu pynkynmaw, u Governor ba mynshuwa jong ka Meghalaya, u Ganga Prasad, u la pynkup burom ia u Feridinand Suchiang halor kitei ki jingjop donburom jong u ha khmat ka purthei,  ha ka 3 tarik u Jymmang, 2018 ha Raj Bhawan Shillong.

Ha ka jingiadei bad  kane ka jingwanrah nam bad burom jong Ferdinand Suchiang ha ka madan ialehkai Martial Arts jong ka pyrthei ia ka Jaibynriew, ka jyllla  bad ka ri India hi ruh baroh kwei, ka seng  kan sa phah ruh ia ka dorkhast sha ka sorkar jylla bad sorkar India ban leh ei ei na ka bynta jong u  kum ka dak jong ka jingithuh, jingpynshlur bad jingaimynsiem ia u Ferdinand Suchiang  ba un nang trei shitom.

Lada lah ban ai burom kan long ban ai mynsiem ia u ba un dang iaid sha khmat  ha katei ka sap ka  phong  jong u bad ruh kum shi bynta jong ka jingpynshlur ia kiwei pat ki samla jong ka jylla ba kim dei ban duh jingkyrmen hynrei ba ki dei ban iaid shakhmat bad trei shitom ban kyntiew ia ka sap ka phong kaba ki don ha  ki kam ialehkai bad ruh wat ha kiwei kiwei dei ki sap ki phong kiba ki lah ban don.

 

 

What Next?

Recent Articles

Leave a Reply

Submit Comment

*