Shillong, Iaiong 13: U Symbut Myntri rangbah ka jylla u bah Prestone Tynsong u la ong ba ka sorkar ka da kyrpad jur ia baroh kito kiba dang sah kut sha bar ka jylla ba kin iai shah haduh ka 30 tarik mynta u bnai.
Na ka liang jong u Bah Prestone u la kyntu ba kin sah ha ka jaka kaba ki don, ia shah shitom haduh ka 30 tarik mynta u bnai u la kyrpad biang ia baroh kito kiba sah kut, kum juh na ki kmie ki kpa jong ki samla pule kiba sah kut sha bar ka jylla kiba la kwah ban wan phai.
La iathuh ba haduh mynta la ioh jingkhien ba baroh kiba la register bad ka sorkar kiba la kwah ban wan phai noh sha ka jylla ki don haduh 3000 ngut, kine ki kynthup ia ki samla pule, ki ba trei sha bar ka jylla. Sa shisien ka sorkar ka kyrpad ia ki sngewbha iai shah haduh ka 30 tarik mynta u bnai.
Ka kabinet mynta ka sngi kala shim ia ka rai ba kan iarap pisa T.3000/- tyngka marwei ia kito kiba sah kut sha bar ka jylla bad kane kan long tang ia ki samla pule, kiba trei bad ki riew shimet. Kito kiba trei bad ka sorkar pdeng ne ki PSU kin nym ioh ia kane ka jingiarap.
