Shillong, Jymmang 27: Ki paidbah jong ka 53-Ampati Konstitwensi kin sa leit ban thep ia ka but jong ki ban jied MLA thymmai ha ka jaka jong u Dr Mukul Sangma ha dien ba u la jop na ki ar tylli ki konstitwensi u la rai ban iehnoh ia ka Ampati bad bat ia ka Songsak ha kane ka elekshon kaba dang shu dep sha ka iing dorbar thawain jong ka jylla Meghalaya.
Ia kane ka elekshon shiteng samoi hapoh jong ka 53-Ampati Konsitwensi la niew ba ka dei ka jingiapynibor hapdeng ar ngut ki nongialam u Dr Mukul Sangma u ba dei na ka seng Congress bad u Conrad K Sangma na ka seng NPP. Kane ka elekshon kan kren ia ka jinglong nongialam hapdeng kitei ar ngut ha Garo Hills.
Wat la ha kane ka election ka dei ka jingialeh hapdeng ki lain gut ki kyrtong ka Miani D Shira jong ka seng Congress kaba dei ka khun jong u Dr Mukul Sangma myntri rangbah barm jong ka jylla, ha kaba u Dr Mukul u la jop san sien lynter hynrei u la rai ban bat ia ka Songsak.
Na ka liang jong ka NPP kala pynieng ia u Clement G Momin u ba la ia khun ia ka elekshon la ar sien pyrshah ia u Dr Mukul na katei ka juh ka, hynrei um shym la lah ban poi sha ka jingjop bad mynta ka NPP kala pynieng ia u ban ia khun pyrshah ia ka khun jong u myntri rangbah barim ka jylla.
U wei pat u kyrtong u dei u Subhankar Coach u ba la ia khun ia kane ka election kum u kyrtong shimet. Ka jingiakhun ha kane ka election ka long beit hapdeng jong ki ar ngut ki kyrtong jong ka Congress bad jong ka NPP, ha kaba ki paidbah la shai ka sngi kin thep ia ka but jong ki ban jie ia u MLA ba thymmai ban mih bujli ia u Dr Mukul kum MLA ba thymmai.
Ka 53-Ampati Konstitwensi ka don 39 tylli ki jaka thep but , ki nongthep but baroh ki don 28545 ngut, na kine ki nongthep but ki shynrang ki don 14179 bad ki kynthei ki don 14366 ngut . Ia ka nusip jong ki lai ngut ki kyrtong yn rai da ki paidbah la shai ka sngi mano ban mih bujli kum MLA ha ka jaka jong u Dr Mukul.
