Shill
ong, Kber 15: Ka Jylla Niam Bah Shillong ka ioh ban pdiang burom biang ha ka sien balai ia ka snap Stashu (Relic) jong u Riewkhuid ba kyrpang u Riewkhuid Anthony (Saint Anthony) jong ka Shnong Padua. Uba long u riewkhuid jong ki nongiada kiba wad jingiarap ban ioh biang ia ki tiar ki tar ki mar ki mata kiba la jah bay m lah ban shem shuh.
Ia kane ka snap jong u Riewkhuid la wanrah mynta ka sngi ha Iing Archbishop Laitumkhrah da ka jingleh burom ba la pdiang sngewbha da u Archbishop Dominic Jala bad ki lyngdoh bad ki riewniam na ki jingiasyllok bapher bapher jong ka Jylla Niam Bah Shillong da ka jingleh niam kaba lyngkot.
Ha ka jingpoi ka snap jong u Riewkhuid ha Shillong la wanrah bad synran da ki heh ka jingiasyllok ki Phadar Phransiskan ( Franciscan) kum u Phadar Alessandro Ratti bad kiwei pat lyngdoh sohblei. Katei ka snap jong u tei u riewkhuid ba la wah iuh kjat nyngkong ha Shillong ka dei ka jingtrei shitom jong u Archbishop Dominic Jala ba la lah ban ioh ha kaba katei ka jingiasyllok Phransiskan ka la jied kyrpang ia ka tang ia ka Shillong napdeng ki nongbah jong ka Jylla Shatei Lam Mihngi ban pynpoi namar ba ka long pdeng. Ia kane la iathuh da u Heh katei ka jingiasyllok Phadar Alessandro Ratti ha ka jingiakren bad ki pathai khubor.
Hadien Ka snap u Riewkhuid Anthony ba la buh ha Iing Bishop la kynriah noh ha Iing Mane Bah ( Cathedral Church) Laitumkhrah da ka jingiaid proseshon ha kaba ki paidbah U Blei ki la ioh ban jngoh bad leh burom ban iasaid ia ki jingdonkam kaba ki kwah ban pan bad don ha ka jingmut.
Ha ka jinglehniam kyrpang ia ka stashu u Riewkhuid Anthony la pynlong da ka Mass Bakhuid ha kaba u Archbishop Dominic Jala u la long kongsan ryngkat lang ki lyngdoh Sohblei Baroh. Hakaba ki paid u Blei bad ki riewniam shynrang bad kynthei ki la ioh ban shim bynta ia kaba la pynbud da ka jingduwai paidbah bad ki paidbah kiba ia tur ban ioh ktah da la ki jong ki kti ban jingkoit.
Kane ka stashu ba la poi ha Shillong ka long ba la ai rong ksiar bad ha ka bynta jong ka kpoh kamon la pong thliew ia kaba la buh ia ka bynta jong ka dkhot met une u riewkhuid ba dang im. Ka daw ba la leh kumne ka long ba utei u riewkhuid uba la iap ha ka snem ba 1235 katba ka bynta jong ka met ba dei u thylliej kam shym pyut satia ka la pynlong ia ka balang ban shim khia ban leh ei ei ban leh ia kaba donkam ban leh tes namar ki kam phyla.
Une u riewkhuid uba la kha ha ka snem 1195 ha Lisbon, iakaba mynta la tip kum ka Ri Portugal na ki kmie ki kpa u Martin bad ka Mary Bulhom. Hadien 36 snem ka ryta u la khlad noh ka balang ka shim por tang shisnem ban kyntiew riewkhuid da u Pope Gregory IX .
Ban phai dien khyndiat ia ka Snap jong une u riewkhuid ba la rah kylleng ka pyrthei ka la sdang naduh ka snem 1996 ha ka jingiada ba kyrpang bad la ban pyndep haduh Shispah tylli ki ri ha kaba kahdduh ka la poi sha India ka la hiar sha Kerela ter ter ki bynta shathie , bad shatei ka ri jong ka India mynshem snem ka wan ha Ri Bangladesh ka poi biang sha India ha Kolkatta bad wan poi sha Shillong myn ha ka 14 tarik ka sah shimiet. Na Laitumkhrah ka let sha St. Paul Seminary Upper Shillong bad St. Dominic Savio Mawlai Parish nangne kan leit phai biang sha Kolkatta. Nangthie na Kolkatta kan leit phai biang sha Basilica jong ka St. Anthony ha Padua, Italy.
