Lada ka sorkar kam leh plie ia ka jaka rung jaka mih ha Umling ki seng bhalang kin pli hi

Shillong, Nohprah 17: Ban bteng ia ka jingdawa ia ka Inner Line Permit ha kane ka jylla Meghalaya mynta ka sngi ki saw tylli ki seng bhalang kaba kynthup ia ka KSU, FKJGP, RBYF bad ka HNYF kila pynlong ia ka jingialang paidbah ha jaka ieng kali ha Motphran ban dawa ba ka sorkar pdeng ka dei ban pyntrei kam ia ka ILP ha ka jylla Meghalaya.

Ha ka jingkren jong u general secretary ka RBYF, u la ong ba ka sorkar pdeng kam shym la burom ia ka jingdawa jong ki 60 ngut ki MLA jong ka jylla Meghalaya namar ba kam shym la ai ia ka Inner Line Permit  namar ia ka rai la shim da ka iing dorbar, lada ka sorkar pdeng kam burom ia ki MLA ha ka ilekshon ka ban wan dei ban khanglad  ia ka jingshim bynta ha ka ilekshon.

Ha ka jingkren u bah Sadon Blah general secretary jong ka seng HNYF, u la ong ban a ki jylla rit paid ha North East kiba khlem pat ioh ia ka ILP dei tang ka jylla Meghalaya bad ka jylla Tripura, kaba sngewsih ka long ba ha dein ba ka iing dorbar kala shim ia ka rai ban dawa ia ka ILP la sdang ka ia kawang ktih pynban.

Ki seng sain pyrthei ki dei ban sangeh noh ia kane ka jingiakawang ktih, ha ka jaka ba kin ia kawang ktih kila dei ban leit sha la ki jong ki konsititwensi ban long ban lang ia ki paidbah kumba ki leh ha ka por ilekshon ban dawa ia ka ILP. U la ong katba ym pat ioh ia ka ILP ka jingpyntrei kam ia ki jaka rung jaka mih kan dang bteng ha ka jylla.

Ha kane ka sngi president ka KSU u samla Lambokstarwell Marngar ha ka jingkren jong u u la ong ba ka seng kan nym shong kli kti ban ia bteng ban dawa na ka sorkar pdeng ba ka dei ban ai ia ka ILP ha kane ka jylla Meghalaya , bad lada ka jingshakri ia ka jaid bynriew ka long beain kin dang iaid bteng ban leh beain.

Ha kane ka sngi u President jong ka FKJGP u bah W. Rani u la ong ka kum ka jaidbynriew ka don kam ia ka Inner Line permit ban iada ia ka jaid bynriew na ka shah tyllep ha kiwei pat ki jaid bynriew. Ha kane ka jingialang la pynsngew ba lada ka sorkar kam lah ban plie ia ka jaka rung jaka mih ha Umling ha ka 21 tarik mynta u bnai ki seng bhalang kin sa leit ban plie hi ia katei ka jaka.

Ha kane ka sngi la thang ia ka dur tyngshop jong u ka Citizenship Amendment Act bad kum juh pyrshah ia ka sorkar National Democratic Alliance. Ha kane ka sngi la don lang ki nongkit kam jong kitei ki saw tylli ki seng. Ha kane ka sngi na ka liang jong ki pulit ruh kila pynkhlain ia ka jingpahara ban peit ba ka jingialang kan iaid beit.

 

 

What Next?

Recent Articles

Leave a Reply

Submit Comment

*