Shillong, Kyllalyngkot 14: Ka Khasi Students’ Union Laban Circle ha ka sngi saitjian kala leit khynra ‘Work Permit’ ia ka jingtei iing ba dang shna thymmai hapoh Sankerdev College. Ha kane ka jingleit jurip, ka Seng ka la lap ba bun da ki bar jylla ki ba ia trei ha katei ka jaka khlem don ki kot ki sla kiba biang kum ka ‘Work Permit’, ka ‘Labour Licence.
Ka seng KSU ka lap ba don ruh napdeng jong ki, ki bym shim don satia ia ka EPIC Card ne kino kino ki kot ki sla ban pynshisha ba ki shong ki sah ha ri India. Haba ia kren bad u kontraktor, u la kubur ba um shim la lah ban pynioh ia ka work permit bad u la mynjur ban beh noh ia ki bar jylla mardor na katei ka jaka bad pyntrei da ki trai muluk kumba la dawa na ka Seng.
Ka Seng ka kyrpad ia ki kontraktor ba kin ai kam ai jam ia ki trai muluk ki trai jaka bad ha kajuh ka por, ka Seng ka maham ruh ba kim dei ban pyntrei ia ki bar jylla khlem ioh ia ka ‘Work Permit’.
Watla ka aiñ ban teh lakam ia ki bar jylla ban wan trei ei hapor ri Khasi kala don, hynrei kum kine ki jingjia ki ju iai ja man ka por, kumta ka Seng ka kyntu ia ki bor pyniaid ne ka Labour Department ba kin trei hok bad peit sani halor ka jingioh rung kyrthep ki bar jylla ki ba tuh ia ka kamai ka kajih jong ki trai muluk ki trai jaka. La ong u samla Reuben Najiar Assistant General Secretary ka KSU Laban Circle.
