Shillong, Naitung 11: Kiba thep kyrteng mynta ka sngi ban ia khun ia ka elekshon Chief Executive Member hapoh jong ka KHADC ki long ka Kong Grace Kharpuri ha kaba kala thep kum ka kyrtong jong ka PDA bad u Bah HS Shylla u la thep kyrteng kumu kyrtong jong ka KDA.
U Secretary jong ka Executive ha dien ba u la bishar bniah ia ki kot thep kyrteng jong kine ki ar ngut ki ban ia khun ia ka elekshon CEM ha KHADC u la shem ba baroh ar tylli ki kot thep kyrteng ki long kiba bit ba biang. U Secretary u la buh ba ka elekshon ban jied ia u CEM ba thymmai kan long la shai ka sngi por 2.00 baje noh phai sngi.
Ia ka kyrteng jong ka kong Grace Kharpuri la tyrwa da u Bah Ban Basaiawmoit jong ka seng PDF bad u Bah Kimfa Marbaniang jong ka seng Congress bad la kyrshan da u Bah D Wahlang jong ka Congress bad u Bah Hedrian Lyngdoh jong ka PDF.
Katba ia u Bah HS Shylla la tyrwa da u Bah Nailantonio War bad u Bah Donkupar Sumer jong ka UDP bad la kyrshan da u Bah Manstudy Nongrem jong ka HSPDP bad u bah Pyniaid Syiem jong ka NPP.